Vittus Aningaasaqarnermut naalakkersuisoqarfimmut uterpoq

KNR-ip paasisai naapertorlugit, Vittus Qujaukitsoq aningaasaqarnermut, aatsitassanut nunanullu allanut naalakkersuisuugallassaaq, Randi Vestergaard Evaldsen inuussutissarsiornermut naalakkersuisuugallassalluni.

Tusarfiit tutsuiginartut KNR-imut taama ilisimatitsipput.

Kim Kielsenip naalakkersuisut nikititernerannik Inatsisartuni ullumikkut nalunaaruteqarnissaa ilimagineqarpoq.

AAMMA ATUARUK Uldumip napparsimalersimanera Kielsenip uppernarsarpaa

Naalakkersuisut nikititernerat pivoq naalakkersuisup Andreas Uldumip qaammatini tullerni pingasuni napparsimalluni sulinngiffeqarallartussanngornera pissutigalugu.

Naalakkersuisut aningaasanut inatsisissamik suliaqaleruttornerini napparsimalluni sulinngiffeqartussanngorpoq, Vittus Qujaukitsorlu suliassaq ingerlatiinnaq aallartissavaa Inatsisartunimi oqaluuserisassani immikkoortut pingasut ullumikkut saqqummiuttussaassagamigit.

Qaleralinnut avaleraasartuunullu akitsuutit allanngortinneqarnissaat pillugu siunnersuut siullermeerneqassaaq, aammalu pilersaarusiortarneq aamma nunaminertat atorneqartarnerat pillugit Inatsisartut inatsisaata allannguutissaatut siunnersuut saqqummiunneqassalluni.

Aamma atuaruk Randi siulittaasuussaaq

Kingullertullu sunoorsinut, sukuluunut qummoroortaatinullu akitsuutit qaffaavigineqarnissaat pillugu siunnersuut siullermeerneqassaaq.

Vittus Qujaukitsup sapaatit-akunneri marluk missaannaat atorlugit aningaasanut inatsimmut amerlanerussuteqartoqarnissaa qulakkeerniartussaavaa, tamannami pinngippat Naalakkersuisut aningaasanut inatsisaagallartumik suliaqartariaqassapput, soorlu aamma taamatut siorna ukiakkut pisoqartoq.

Pisut KNR.gl-imi Radioaviisimilu ingerlaavartumik malittarissavagut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat