Randi siulittaasuussaaq

Demokraatit siulittaasuata, aningaasaqarnermut naalakkersuisup, Andreas Uldumip, ullumiminngaanniit sulinngiffeqalerneranut atatillugu partiimi siulittaasup tullia, Randi Vestergaard Evaldsen, qaammatit - maannamut - pingasut missaanni siulittaasuugallartussanngorpoq.

Allattoq Ane-Marie Petersen, Paarnaq Hansen

novembarip 02-at 2015 16:27

Randi Vestergaard Evaldseni siulittaasuugallarnissamut piareersimanerarpoq.

- Nuanninngilaq taamatut pisoqarnerani siulittaasutut inississalluni soorunalimi. Kisianni akisussaaffik tiguara aammalu ingerlateqqissavakka Andreasip suliai, Randi Vestergaard Evaldsen oqarpoq, Demokraatillu politikkikkut anguniagaat allanngussanngitsut aamma oqaatigaa.

- Soorunalimi allannguisoqassanngilaq. Tamatta qitiusumik anguniakkagut taakkuupput aamma Andap maaniinnginnerani taakku anguniangarivagut.

Aamma atuaruk Uldum stressernini pissutigalugu sulinngiffeqarallalersoq

Partiillu naalakkersuisooqatigiit taakkualu anguniagassaat allannguuteqassanngitsut oqaatigaa.

- Naalakkersuisooqatigiinni ingerlaqqissaagut. Soorunalimi Andreas Uldummi maaniissanngilaq kisianni suliarisagut massakkut ingerlatiinnassavagut, Andreas Uldumimut sinniisoq Randi Vestergaard Evaldsen oqarpoq.