Uldum stressernini pissutigalugu sulinngiffeqarallalersoq
Demokraatit siulittaasuat 36-nik ukioqartoq Naalakkersuisullu siulittaasuannut tullersortaasoq, sapaatit-akunnerini tulliuttuni sulinngiffeqarallassaaq. KNR taama paasitinneqarpoq.
Taamatut inissisimasoqarnera sapaatit-akunnerata siuliani pilersimavoq, KNR-illu paasissutissaatai naapertorlugit Naalakkersuisut katitigaanerisa allanngornerat Naalakkersuisut piariingajalerpaat.
Aamma atuaruk Aningaasanut Inatsit naalakkersuisoqatigiinik avissaartuutsitsivoq
Siulittaasup taarsernera iluatsilluartoq
Anda Uldum partiimi socialliberaliusumi siulittaasutut siorna marsip qaammataani qinigaavoq, tamanna pivoq Jens B. Frederiksenip aatsitassarsioqatigiiffimmi True North Gemsimi atorfininnerata annertuumik isornartorsiorneqarnerata kingorna.
Demokraatit rockimik nipilersortartuusimasoq siuttoralugu 2014-imi ukiakkut qinersinermi qinigaatitatik marloriaatinngortippaat sisamanngortillugit. Tamatuma kingorna partiip Siumut Atassullu naalakkersuisooqaatigiinnissamik isumaqatigiissuteqarfigai, Anda Uldum aningaasaqarnermut naalakkersuisutut toqqarneqarluni.
Aningaasaqarnermut naalakkersuisunngornermini nunatta karsiata ingerlatsinermut sanaartornermullu 222 millionit koruuninik amigartooruteqarfiunera naalakkersuisut siuliinit kingornuppaa. Taamatut amigartooruteqarneq Naalakkersuisut ukiut arlariit ingerlanerini iluarsissallugu toqqarpaat, akitsuusersuinikkut aammalu soraarnerussutisiaqartarnerup aaqqissuussiffigeqqinneratigut. Siunnersuutillu taakku annertuumik isornartorsiorneqarput.
Aamma atuaruk Uldumip naqissuserpaa: Nunatta karsiata amigartooruteqarnera tamanut sunniuteqassaaq
Aamma atuaruk Qaleralinnik akitsuusiinissaq Andap illersoraa
Akitsuusiinissamik siunnersuut Anda Uldumip tunuartiinnartariaqarpaa, siunnersuut amerlaqisunit, Inatsisartuni Demokraatit ilaasortaatitaat ilanngullugit, sakkortuumik isornartorsiorneqarmat. Siunnersuut nutaaq oktobarip qiteqqunnerani saqqummiunneqarpoq, taannalu aamma ilassilluarneqarpallaarani.
Aamma atuaruk Naalakkersuisut akitsuusersuiniarnertik annikillisippaat
