VIDEO Uldumip naqissuserpaa: Nunatta karsiata amigartooruteqarnera tamanut sunniuteqassaaq
Innuttaasut, suliffeqarfiutillit Inatsisartunullu ilaasortat sakkortuumik isornartorsiuipput, aningaasaqarnermulli naalakkersuisup Anda Uldumip akitsuutinik qaffaanissap pisariaqarnera aalajangiusimavaa.
- Oqarsinnaanngilanga isumassarsiatsialaasoq, kisianni aningaasaqarnikkut inissisimanerput naapertorlugu iliuuseqassagutta arlaatigut iliuuseqartariaqarpugut akisussaassusilimmik ingerlatsissagutta. Taamaammat akitsuutit aalajangiiffigisassatut Naalakkersuisut aalajangerput, Anda Uldum KNR-imut taama oqarpoq.
Aamma atuaruk VIDEO Akitsuutit nutaat inuuniarnitsinnut sunniuteqassapput
Akitsuutinik qaffaanissami ilaatigut neqinut avataanit eqqussorneqartunut akitsuutip qaffanneqarnissaa atuisartunit akerlerineqarpoq.
- Suna tamarmi akitsoraluttuinnarpoq, taavalu inuuniarneqa ilungersunareertigisoq aamma taamatut qalleeqqissappata soorunami inuiaqatigiinnut tamatsinnut oqimaatsorujussuussooq tamatsinnut, Susanne Gjerulf Heinrich Brugsenimi niuerniartoq taama oqarpoq.
Ernumassuteqarneralu ningaasaqarnermut naalakkersuisup paasilluarsinnaanerarpaa, nunattali karsia amigartooruteqarfiutillugu iliuuseqartoqartariaqartoq aamma oqaatigaa.
- Akisussaassulimmik aningaasaqarnikkut ingerlatsissagaanni matussusiisariaqarpugut, taamaammat allatut ajornaqaaq taamatut saqqummiisariaqarsimavugut. Soorunami paasisinnaalluarpara ernummatigisaa, kisianni avaqqunneqarsinnaanngilaq iliuuseqartariaqaratta akisussaassusilimmik aningaasaqarnermik ingerlatsissagutta.
- Neqit avataanit eqqussorneqartut akitsuuserneqarnissaat qangaaniilli oqallisaavoq, aamma neqinik nunatsinneersunik atuinerup annertusarnissaanut aqqutissatsialattut isigineqartariaqarpoq, naalakkersuisoq oqarpoq.
Aamma atuaruk Siumumeersup allap akitsuutinik qaffaaniarneq akerleraa
Allaffissornikkut sipaarniuteqarnissaq
Partiit naalakkersuisooqataasut pingasuusut akornanni inatsisartunut ilaasortat Siumumeersut Demokraatineersullu ilaasa siunnersuut isornartorsiorpaat, neqillu, sukkut, sunoorsit, qummoroortaatit ikummatissallu pinngikkaluarlugit 96,5 millionit koruunit allatigut nassaariniarneqartariaqarsoralugit.
- Nammineerluta aalajangiisinnaasuugutta pisariillisaanerit sipaarniuteqarnerillu ingerlatissagaluarpagut, Demokraatit sinnerlugit Inatsisartunut ilaasortaq Tillie Martinussen oqarpoq, allaffissornerlu annertooq Nunatsinni pissutsit tunngaviginagit Danmarkimili pissutsit tunngavigalugit ilusilerneqarsimasoq innersuussutigalugu.
Allatut oqaatigalugu, atuisunut akisunerulersitsinissaq Demokraatit nalinginnaasumik politikkerinngilaat.
Aamma atuaruk Ilisimatooq: Pisiassat akitsoraangata pisisut ikilisarput
Uuliamut akit apparnerat malugineqanngitsuussaaq
Uuliamut akigitinneqartut qaffattussaanngitsut aningaasaqarnermut naalakkersuisoq nassuiaavoq, Polaroili aappaagu akit nutaat pillugit isumaqatigiiniartussaammat.
- Assersuutigalugu uuliamut nappartamut ataatsimut aki 2014-imi septembarip qaammataani 91,5 dollarsiusoq ullumikkut 44,5 dollarsiuvoq. Tassanngaanniillu 60 millionit koruunik sipaarniartussaavagut.
- Tamannalu iluatsissinnaassappat atuisartut sunnguamilluunniit malugisaqarnavianngillat, Anda Uldum taama oqarpoq.
Aamma atuaruk SIK-p siulittaasua: - Akitsuutinik qaffaaneq sulisartunut eqquinerlussaaq
Nassuerutigaali nioqqutissanut akitsuutit atuisartut malugissagaat, nunattami karsiani amigaatigineqartunit 90 millionit koruuninit 34 millionit koruunit taakkunannga pissarsiarineqarnissaat siunnersuutigineqarpoq.
- Soorunami akitsuutit passukkaanni eqqugaasussat tamarmiusarput. Pisisartut tamarmik eqqugaassapput.
- Nunattali pissarititaanik atorluaanerunissamut aqqutissiuussisinnaassaaq.
Taamaammat matumani ajugaasut marluusinnaapput, taama oqarpoq.
Anda Uldumip tamatumunnga peqatigitillugu naqissuserpaa aningaasanut inatsisissap isumaqatigiinniutigineqarnissaa qilanaaralugu, siunnersuutillu Naalakkersuisut siunnersuutaannit pitsaanerusut ilassilluarneqassasut oqaatigalugu.
