SIK-p siulittaasua: - Akitsuutinik qaffaaneq sulisartunut eqquinerlussaaq

Tamanna pissaaq Inatsisartut ukioru ataatsimiinnerminni akitsuutinik qaffaanikkut 96 millionit koruuninik isertititsinissamut siunnersuut akuerissappassuk.

Nunatta karsiata amigartoorutai taamaalilluni inuiaqatigiit akilertussanngussavaat.

Kisianni inuiaqatigiinnut eqquinerlussasoq, inatsisartuni ilaasortaq Siumumeersoq Ineqi Kielsen isumaqarpoq.

Aamma taamaaliorneq sulisartunut eqquinerlussasoq, SIK-p siulittaasua Jess G. Berthelsen isumaqarpoq.

- Orsussamik qaffaaneq annertuumik ilaasortatsinnunaasiit eqquissaaq. Tamatuma kingunerussammagu aamma ilaasortatta aningaasarsiassaat piussutigineqarsinnaanerat aamma annertuumik innarlerneqassammat, Jess G. Berthelsen oqarpoq.

Aamma atuaruk Sukkulaatinut, neqinut tupanullu akitsuut qaffanneqalerput

Inatsisartuni ilaasortaq Ineqi Kielsen Siumumeersoq inuiaqatigiinnut ajornerusumik kinguneqarnissaa peqqutigalugu parteeqatimi siunnersuutaat akerleraa.

- Akitsuiniarneq taanna inuiaqatigiinnut annertoorujussuarmik eqquisinnaasoq isumaqarpunga, Ineqi Kielsen oqarpoq.

Akitsuutinilli qaffaaniarneq peqquteqarpoq. Tassami Nunatta karsia aningaasassaaleqivoq.

Ineqi Kielsenip allaffeqarfissuit nunani allaniittut nunatsinnut nuunnerisugut sulisut akileraarutaannit aningaasanik isertitserusuppoq.

- Suliffeqarfissuaatitta nunatsinni angerlarsimaffeqaraluartut avataani immikkoortortaasa aammalu ilaatigut nalunngilarput Rayal Grrenlandip aamma Royal Greenland Seafood A/S, 500 tikillugit sulisullit sooq nunatsinniitsinngilarput?, Ineqi Kielsen aperivoq.

Royal Greenlandimiilli ilisimatitsissutigaat, Royal Greenland Seafoodimi sulisut 200-it missaanniittuusut.

Royal Greenland ukiut kingulliit sinneqartoorluartarpoq, nunatta karsianut iluaqutaalluartumik. Tamanna pisinnaalerpoq, Royal Greenland suliamik sungiussissimalluartunit ingerlanneqalermat, minnerunngitsumillu siulersuisut politikkerertaqarunnaarmata.

Aamma atuaruk VIDEO Naalakkersuisut aappaagumiit akitsuusersuinissaq siunniuppaat

Aalisarnikkut matussusiisoqarli

SIK siulittaasuata akitsuutinik qaffanissaq aamma akerleraa. Aningaasanillu matussisiiniarnermut aalisarneq aqqutaassasoq orniginerullugu.

- Assersuutigalugu misissorneqartariaqartut ilagivaat immaminngaannit qaqitagut annertunerusumik suliarereerlugit maani nunatsinninngaanniit anninneqartarsinnaanersut. Taakkupput suliffinnit aamma amerlasuunik pilersitsisussat taamaalillunilu aamma akileraarutitigut nunatta karsianut isaatitsisussat, SIK siulittaasuaq oqarpoq.

Tunngavilersuulli taanna nutaajoqqajanngilaq taavalu aamma ilungersuutaareerluni. Nunattali karsia maannakkorpiaq amingartoorpoq

Jess G. Berthelsenilli siunnersuut alla qangali tusartariigarput saqqummiuppaa, aammali taanna amigartoorutinut matussutaanavianngilaq:

- Imaanngilaq landskarsi sinneqartoortinniaannarlugu budgetsiliortoqassasoq. Eqqugaasussat eqqaamaneqartariaqarput, Jess G. Berthelsen oqarpoq.

Ineqi Kielsenip aamma taama isumaqarpoq.

- Mutinngoriartulersimavoq immaqa akitsuusiisarneq. Ineqi Kielsen oqarpoq.