Sukkulaatinut, neqinut tupanullu akitsuut qaffanneqalerput

Nunatsinni inuuniarneq akisunerulissaaq. Nunattami karsiata amigartoorfiunera ilaatigut pissutaalluni inuuniarneq akisunerulersinnaassaaq, sukkulaatinut, neqinut tupanullu akitsuutit qaffanneqalermata.

Naalakkersuisummi siunnersuutaat ilalerneqassappat mamakujuit, neqit nunatsinnut eqqussukkat, tupat qummoroorartartullu akisunerulissapput. Taakkununngami akitsuutit qaffanneqarnissaat Naalakkersuisut siunnersuutigaat.

Katillugimmi 96,5 millionit koruunit Nunatta karsianut akitsuutitigut isertitsissutigineqarnissaat Naalakkersuisut siunniuppaat. Isertitassatulli naatsorsuutigineqartut amerlanersaat solarimik gassimillu annertunerusumik akitsuusersuinikkut isertinniarneqarput.

Aamma atuaruk VIDEO Naalakkersuisut aappaagumiit akitsuusersuinissaq siunniuppaat

Orsussat assigiinngitsut akitsuusersorniarneqaraluartut Naalakkersuisut naatsorsuutigaat nunarsuarmi tamakkununnga akigitinneqartut appariartornerat ilutigalugu atuisut aningaasartuutikinnerulissasut.

Neqinut akitsuutit qaffanneqarnerisigut Nunatta karsiata isertitassai 34 millionit koruunit missinginik isertitaqarnerulernissaa Naalakkersuisut naatsorsuutigaat.

Akitsuutinik qaffaanerit pisiassat akii aqqutigalugit nioqqutissanik pineqartunik atuisartunit akilerneqarnissaat Naalakkersuisut naatsorsuutigaat. Naalakkersuisulli aamma naatsorsuutigaat atuisartut neqinik eqqussorneqartunik atuinermik ilaa kalaallit tunisassiaannik atuinerulernermikkut taarsissagaat.

Aamma atuaruk Akileraarutit akitsuutillu Naalakkersuisunit Sulisitsisunillu misissoqqissaarneqassapput 

Taamaattoq Peqqissutsimut Naalakkersuisoqarfiup isumakulunnartoqartippaa neqit eqqussorneqartut akitsuutaasa qaffanneqarnerat inuit peqqissusiannut sunniuteqarnerlussinnaasoq, neqimmi tunisassianik orsoqarnerullutillu tarajoqarnerusunik akikinnerusunik taarserneqarsinnaammata.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat