VIDEO Akitsuutit nutaat inuuniarnitsinnut sunniuteqassapput
- Assersuutigalugu, aana kukkukooq 1 kg sinnilaarlugu oqimaassusilik massakkut 45 koruuneqartoq akitsuutit nutaat atuutilissappata 3 koruunit 50 ørinik akitsussaaq, 48 koruunit 50 ørenik akeqalissalluni, Jes Nyborg Nuummi Brugsenimi aqutsisoq KNR-imut oqarpoq.
Neqillu akisunerulernissaat pisisartut akerleraat:
- Suna tamarmi akitsoraluttuinnarpoq taavalu inuuniarneq ilungersunareertigisoq aamma taamatut qalleeqqissappata soorunalimi inuiaqatigiinnut oqimaattorujussuussaaq tamatsinnut, pisisartoq Susanne Gjerulf Heinrich KNR-imut oqarpoq.
- Isumaqarpunga naapertuutinngitsoq, allarpassuartigut immaqa aamma ujartuisoqarsinnaagaluarpoq, pisisartoq Birgithe Christensen KNR-imut oqarpoq.
- Siumut eqqarsaatigissagutsigu suna tamarmi oqimaareerpoq, suli qaavatigut ilaartoqqinniarunitigut naak siunissami inuussutissarput? Susanne Gjerulf Heinrich aperaaq.
Taakkuli kisimik qaffaaffiginiarneqanngillat
Orsussat akitsuutaasa 10 øremiit 55 øremut qaffanneqarnissaat aalisartut inuuniarnerannut toqqaannartumik eqquissaaq.
- Umiatsiamut akilersuivugut, ilaquttagut nerisassaqartinniarpagut, umiatsiap sillimmaserneranut aamma akilersuivugut. Aningaasartuuteqarneruliinnarnikkut benziinamut tamakkununnga eqquissaaq, aalisartoq Rasmus Tobiassen KNR-imut oqarpoq.
Aalisartup Rasmus Tobiassenip aalisariarnermini ullormut benziina 80 literi missaani atortarpaa.
- Ningitsiartornerinnarmi 70-80 literi atortarpara, taava aqagukkut amuariartuleruma aamma 80 literi missaani atussavara, Rasmus Tobiassen nassuiaavoq.
Ullumikkut akiusut malillugit aalisartup ullormut 480 koruunit missaani orsussamut atortarpaa, agguaqatigiisillugu qaammammut 12.000 koruunit. Qaffaasoqarpallu aalisartup qaammammut agguaqatigiisillugu 14.000 koruunit missaani atortalissavaa, ukiut 144.000 koruunit orsussaannarmut atortalissallugit.
Akitsuusersuinissat piviusunngussappata tamatta eqqugaasussaavugut. Annilaangassutigineqarporli pissakinnerusut annerusumik eqqugaanissaat.
- Assersuutigisinnaavarput neqinut akitsuusersuiniarneq, taanna innuttaasunut eqquissaaq, taamaasillunilu pissakilliortunut eqquissalluni aamma. Taanna pillugu Naalakkersuisut oqaluukkusuppavut, inatsisarunut ilaasortaq Naaja Nathanielsen KNR-imut oqarpoq.
- Pissakinnerit sutigut tamatigut ajoraluartumik taamatut akitsuusiinikkut, imaluunniit akitsuusiinikkut aammalu akileraarusiinikkut taakkuupput annertunerpaamik eqqorneqartartut, SIK-p siulittaasua Jess G. Berthelsen KNR-imut oqarpoq.
