Qaleralinnik akitsuusiinissaq Andap illersoraa
Nukissiuuteqarnermut neqinullu eqqussukkanut akitsuusiinissamut isornartorsiorneqartumut taarsiullugu taamatut akitsuusiisoqassaaq, Anda Uldumilu naapertorlugu nunatta karsianut 20 millionit koruuninik isertitsissutaassalluni.
Akitsuusiinerup aamma siunertaraa qalerallit suliareqqaarnagit avammut nioqqutiginagit, qalerallit Nunatsinni suliarinissaannut avammut nioqquteqartartunut pilerinarnerulersinnissaa, suliffissanik pilersitsinissaq aammalu akileraarutitigut isertitat amerlisinneqarnissaat.
AAMMA ATUARUK Akitsuusiineq tulluartuusoq Siumut isumaqarpoq
Aalisakkerinermilli suliffeqarfimmi Halibutimi pisortap Niels Thomsenip qaleralinnut akitsuut piviusunngortinneqassappat sianiitsuliortoqarsinnaanera politikerinut mianersoqqussutigaa.
- Nunarsuarmi pisisartut qalerallit ilivitsut suliarineqarsimanngitsullu piumavaat, pingaartumik kiilup tungaanut oqimaassusillit. Taakkulu akisunerulissappata unammillertivut ajorsarfigissavagut, Niels Thomsen KNR-imut taama oqarpoq.
AAMMA ATUARUK Akitsuusiineq aningaasanik atornerluinerinnaassaaq
Sulisitsisut kattuffiata GE-p pisortaata Brian Buus Pedersenip akitsuutit pillugit siunnersuut karsimi amigaatinut aqqiiniutaannaasutut KNR-imut siornatigut oqaatigaa.
GE naapertorlugu qalerallit tulaassinnarlugit, suliareqqaarsinnarlugillu avammut akikinnerusumik niuerutiginerinit qalerallit suliarineqanngitsut piumaneqartupilussuillu avammut nioqqutigineqarneri iluanaarutaanerujusuupput.
Akitsuusiinissap qularnaatsumik sunniuteqarnissaa arlalitsigut nalornissutaasoq naalakkersuisup Anda Uldumip nassuerutigaa.
Aammalu avaqqunneqarsinnaannginnerarpaa tunisassiortut, naak akitsuusiisoqaraluartoq, qalerallit suliareqqinneqaratik anninneqarnissaat ingerlatiinnassagaat.
- Taamaattoqassappallu taarsiissutitut nunatta karsianut isertitsissutaanissaa qulakkeerneqassaaq, Anda Uldum taama oqarpoq.