Aningaasanut Inatsit naalakkersuisoqatigiinik avissaartuutsitsivoq

Aningaasanut Inatsit Naalakkersuisunit siunnersuutaasoq, Siumumit tamakkerlugu isumaqatigineqaraluarpoq aammali Siumup ilaasortaanit amerlasuunit isumaqatigineqanngitsoq, ullumi oqallinnermi paasinarsivoq.
Assi © : KNR
septembarip 30-at 2015 18:21

Nunatta aappaagumut aningaasaqarnera pillugu siunnersuutit naammassineqareeraluartut aamma aningaasat qanoq atorneqarnissaat aaqqinneqareeraluartoq, taamaattoq Naalakkersuisunit naqissuserneqarpoq, tamanna siunnersuutaaginnarallartoq, allamik naamik.

Tamanna pisarnermut ilisimasatsinnut naleqqiullugu allaaneruvoq, oqallinnermilu ersersinneqarpoq taamaaliornissaq pingaaruteqartuusoq.

Suut salliutinneqassanersut oqallinnermi isumaqatigiissutaanngillat. Tamanna ilaatigut ersersinneqarpoq, Aningaasanut Inatsisissap aappaagumoortup ullumi oqallisigineqanngitsiarnerani, Aningaasaqarnermut Naalakkersuisup KNR-imut tusarliummagu, akitsuusiinissanik pilersaarutit oqallisigineqarnissaat kinguartikkallarneqartoq tamannalu aningaasanut inatsisip isumaqatigiinniutigineqarnissaanut ilaassanngitsoq.

Aningaasaqarnermut Naalakkersuisoq KNR-imut aamma oqarpoq akitsuutit Inatsisartuni ilaasortanit amerlanernik isumaqatigineqarnissaat siunertaralugu tamanna partiinik ataasiakkaanik oqaloqatigiissutigineqareerpat aatsaat Inatsisartunut saqqummiunneqassasoq.

 

Siumut: Aningaasanut Inatsit tamakkerlugu isumaqatigaarput

Aningaasanut Inatsit ullumi siullermeerlugu oqallisigineqarmat, Siumup aningaasaqarneq pillugu oqaaseqartittagaata, Jens Immanuelsenip erseqqissarpaa, siunnersuut tamakkerlugu Siumumit isumaqatigineqartoq.

- Nunarput aningaasakilliorpoq tamannalu aaqqinneqartariaqarpoq, Jens Immanuelsen oqaluttarfimmit oqarpoq.

Taassuma saqqummiinerata naammassiartornerani paasinarpoq, Aningaasanut Inatsit tamakkerlugu Siumup Inatsisartuni ilaasortaatitaannit tamanit isumaqatigineqanngitsoq.

Tamannalu Inuit Ataqatigiit siulittaasuannit, Sara Olsvigimit aningaasanullu tunngasunut oqaaseqartartup, Naaja Nathanielsenip malugisimallugu tikkuarpaat.

Tamatuma kingorna Jens Immanulsenip akissuteqarnermini oqaatigaa, partiit akornanni tamanna pillugu isumaqatigiinngitsoqarpat tamanna erngerluni oqaatigisariaqartoq. Aamma oqaatigalugu tusagassiuutini allaaserineqartoq, tassalu Naalakkersuisoqatigiit iluanni tamanna pillugu isumaqatigiinngitsoqartoq, tamannalu oqaaseqartup uppernarsarpaa, tassa taamaattoqartoq.

 

Atassutip uppernarsarpaa isumaqatigiinngitsoqartoq

Atassutip oqaaseqartitaa, Steen Lynge aamma oqarpoq, naalakkersuisoqatigiit akornanni isumaqatigiinnginneq peqqinnartuusoq, naalakkersuisoqatigiillu suleqatigiilluarnerannik tamanna takussutissiisoq.

Tassalu tamanna Aningasaqarnermut Naalakkersuisup siunniussai siunnersuutaalu eqqarsaatigalugit, Naalakkersuisut ajorsarnerannik taasariaqarluni, naak aningaasaqarnerput pillugu isumaqatigiinniarnerit suliluunniit aallartinngitsut taamaattoqarluni.