Illuatungiliuttut: Naalakkersuisut amerlinerat torrallaanerunngilaq

Andreas Uldumip napparsimalluni sulinngiffeqarnerata nalaani, Nunatta aningaasaqarnerata akisussaaffigineqarnera annertooq aamma politikkikkut suliassat annertunerpaartaattut oqaatigineqartartoq, Vittus Qujaukitsumit ullumikkummiit akisussaaffigineqalerpoq.

Vittus Qujaukitsullu ulloq manna tikillugu akisussaaffigisai tassaasut Inuussutissarsiornermut, Suliffeqarnermut Niuernermullu naalakkersuisoqarfia, Demokraatit Inatsisartuni ilaasortaatitaannit, Randi Vestergaard Evaldsenimit akisussaaffigineqalerlutik.

- Ulluinnarni suliaqarnermi aammalu Naalakkersuisut katitigaaneranni politikkikkut oqimaaqatigiissitsinissaq attatiinnarlugu, Inatsisartuni ilaasortap, Randi Vestergaard Evaldsenip, Demokraatineersup, Naalakkersuisuni ilaasortatut nutaatut akuerineqarnissaa inassutigissallugu aalajangerpunga.

Aamma atuaruk Naalakkersuisunngortut nutaat aajukua

Inatsisartut sapaatip akunnerani ataatsimi ataatsimiinngereersullu ullumi ataatsimeeqqilerneq aallarnerlugu, Naalakkersuisut siulittaasuat, Kim Kielsen taama tamanut nalunaaruteqarpoq.

Taama nalunaaruteqarnera pivoq, aningaasaqarnermut aatsitassanullu naalakkersuisup, Andreas Uldumip napparsimanini pissutigalugu qaammatini pingasuni sulinngiffeqarallarnissamik qinnuteqarnerata kingorna.

Randi Vestergaard Evaldsenip maanna Naalakkersuisutut atuutsinneqalernerani naalakkersuisoqarfiit maanna qulinngorput.

Aamma atuaruk Vittup uppernarsarpaa: Aningaasaqarnermut naalakkersuisunngorpoq

Tamannali Inatisartuni illuatungiliuttunit torrallaanertut isigineqanngilaq.

Torrallaanerunanilu aningaasartuutaaginnassaaq

Andreas Uldumip napparsimanini pillugu sulinngiffeqarnera, Inuit Ataqatigiit politikkikkut oqaaseqartartuata, Aqqaluaq B. Egedep paasilluarsinnaallugu oqareerluni aamma oqarpoq, Naalakkersuisut akornanni nutaamik aaqqissuussineq aningaasanik atuilluarnerunngitsoq.

- Taamaammat Naalakkersuisoqarfinni sipaarniassaarsuannitta nalerpiaani naalakkersuisoqarfiit aningaasarpassuarnik atugassaqaleriasaarnerat aqqiinermik uqinnersiornertut isigaarput taamatullu aningaasarsiornikkut sipaarniarnermi tamanna pimoorussinertut isiginatigu, Aqqaluaq B. Egede oqarpoq.

Aamma atuaruk Uldumip napparsimalersimanera Kielsenip uppernarsarpaa

Naalakkersuisoqarfiit maanna qulinut amerlineqarneri, Partii Naleqqap siulittaasuata, Hans Enoksenip torrallaanertut isiginngilaa.

- Aningaasanik atuilluarnerunngilaq. Aningaasanik isaatitsiniarlutik Naalakkersuisut akitsuutinik qaffatsitsisaqattaarput. Taakkulu isiginngitsutut illugit aningaasartuutissanik nutaanik annertuunik ikkussuinerat Partii Naleqqamiit paasiuminaatsipparput, Hans Enoksen oqarpoq.

Anda paarlatseqartariaqarmat akuersaarpugut

Inuussutissarsiornermut, Suliffeqarnermut Niuernermullu naalakkersuisoqarfiit, Randi Vestergaard Evaldsenimit akisussaaffigineqalerneri Demokraatinit  iluarisimaarneqarpoq.

- Partiiuvugut aningaasarsiornermik akisussaaffeqarluta sulisugut, taamaattumik Nunatta aningaasatigut ajornerusumik eqqorneqannginnissaa pillugu, Demokraatinit aalajangerpugut, Andreas Uldumi napparsimanerata nalaani taanna taarteqartariaqartoq.

Aamma atuaruk Randi siulittaasuussaaq

Demokraatit Inatsisartuni ilaasortaatitaa, Tillie Martinussen taama oqarpoq.

Aningaasaqarnermut Aatsitassanullu Naalakkersuisoqarfiit Andreas Uldumip napparsimajunnaaruni akisussaaffigeqqilernissaat qulakkeerniarlugit Demokraatit naalakkersuisoqarfinnik maanna tigusigallarnernut tamanna pissutaasoq, Randi Vestergaard Evaldsen KNR-imut oqarpoq.

Aamma atuaruk Uldum stressernini pissutigalugu sulinngiffeqarallalersoq