Aningaasanut inatsit kingullerpaamik isumaqatigiinniutigineqalerpoq

Aningaasanut inatsisissap pingajussaaneerlugu oqallisigineqarnissanut akunneq ataasiinnanngortoq Inuit Ataqatigiit naapeqatigiiffiusinnaasumik suli neriuuteqarput.

- Killissaa tikillugu anguniagarput sorsuutigissavarput.  Aningaasanut inatsisissaq suli aalajagiiffiginngilarput. Neriuutigaarput partiit allat isummatik allanngortissagaat siunnersuuterpullu taperserlugu. Taamaattoqassagaluarpammi aningaasanut inatsimmut immaqa akuerseqataalluta taasisinnaanissarput periarfissanngorsinnaassammat, Inuit Ataqatigiit aningaasaqarnermut oqaaseqartartuat, Naaja Nathanielsen oqarpoq.

Aamma atuaruk Aningaasanut inatsisip tamanit isumaqatigiissutiginissaanut millionialunnguit akornutaapput

Illuatungiliuttut aappaata Partii Naleraq akuersillutik taasiniarnerarput naak sinerissap qanittuani aalisartut akitsuusersuiffigineqarnerat isumaqatiginngikkaluarlugu.

- Akuerinngisagut tassaapput aalisarnerminngaannit aningaasat aaniarneqartut. Aningaasarparujussuit taakkua akittuusiiniarnerit taamaammat isumaqataaffiginngilagit aamma naaggaaqqittussaavagut. Kisianni taassuma saniatigut soorunami naliginnaasumik inuiaqatigiit ingerlatsineqarneranut assigiinngitsut akueralugit taasissuugut, Partii Naleqqap aningaasaqarnermut oqaaseqartartua Anthon Frederiksen, Naalakkersuisooqatigiit pingasunngormat atsioqatigeereertullu oqarpoq.

Aningaasanut inatsisip isumaqatigiissutigalugu atsioqatigiinnermi pingasunngormat Inuit Ataqatigiit peqataanngillat. Sulili neriuutigaat pingajussaanik oqallinnermi partiinit amerlanernik isumaqatigiittoqalerumaarnera.

Aamma atuaruk Naalakkersuisut aningaasanut inatsimmi sipaarutissanik allanik saqqummiussaqartut

Inuit Ataqatigiit aningaasanut inatsimmut akuersillutik taasissagunik siunnersuutitik ilalerneqarnissaat piumasarivaat.

Ilaatigut Piareersarfinnut aningaasaliissutinit 73 millionit koruuniusunit 5 millionit koruunit ilinniarfiusinnaasunut allanut atorneqassasut siunnersuutigalugu.

- Inuusuttuaqqat atugaat assigiimmik nalilerneqarsinnaanngillat. 16-inik ukiullit, 18-inik ukiullit 23-inillu ukiullit meeqqat atuarfiini angusaat assigiinneq ajorput aamma atugarisaat assigiinneq ajorlutik taamatullu Nunatsinni sumi najugaqarneri assigiinngitsupiluussuullutik. Taamaattuminguna isumaqartugut periarfissat assigiinngitsuusariaqartut ataasiakkaallu atorfissaqartitsinerat naapertorlugu aaqqissuussiffigineqarlutik.

Naalakkersuisoq akissuteqarpoq

Aningaasat ikittutut Naaja Nathanielsenip taagugai Piareersarfinnut atorneqartussat pillugit, Suliffeqarnermut Niuernermullu Naalakkersuisoq, Randi Vestergaard Evaldsen ullaap tungaa ima akissuteqarpoq:

- Nunami tamarmi Piareersarfiit ilassutinik 250-inik tigusaqarsinnaalerput, ilaatigut inuusuttunut suliffeqarfiusumut attuumassuteqannginnerpaanut sannavinni ingerlassanut allatigullu atuagarsornertaqanngitsunik neqeroorutinut atorneqassasunik, Randi Vestergaard Evaldsen tusagassiutinut nalunaarummi allaaserisaqarpoq.

Aamma atuaruk Qaleralinnut akitsuusersuinissaq akuersissutigineqarpoq