Anguteq Ittuk ikkarlisaarnermini ajoqusersimavoq

Royal Arctic Linep nunaqarfinnut angallataa Anguteq Ittuk Aasiaat eqqaani immap naqqanut ikkarlisaarnerata kingorna nunaqarfinnut ingerlaartarnera unitsinneqarallarpoq.

Allattoq Jaaku Lyberth

juunip 19-at 2014 05:02

Anguteq Ittuk aqqartartunit misissuiffigineqarnerani paasineqarpoq ajoqusersimasoq, taamaattumillu Nuummi amutsivimmi suliarineqartariaqartoq.

Anguteq Ittuk qanoq ajoqusersimatiginersoq qanorlu sivisutigisumik amutsivimmi suliarineqassanersoq Royal Arcic Linep nunaqarfinnut kiffartuussivianit oqaatigineqarsinnaanngitsoq nalunaarutigineqarpoq.

Nassiussat Anguteq Ittummi usigineqartut Royal Arctic Bygdeservicep angallataannit Angaju Ittummit Pajuttaammillu assartorneqassapput.

Angaju Ittuk Nuummit aallassaaq tallimanngornermi juunip 20-ani juunillu ulluisa 26-at tikillugu Kangaatsiap eqqaani nunaqarfiit angallavigissavai.
Pajuttaat Aasiannit aallaaveqarluni Anguteq Ittuup usigisai angallavigisaalu juunip 19-ianit 21-ata tungaanut Aasiaat eqqaani angalassaaq.

Anguteq Ittuup amutsivimmiinnerani Royal Arctic Bygdeservicep nunaqarfinnut angallatai allat sapaatit akunnerini tulliuttuni angallavigisassai pilersaarusiorneqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.