Angut Sermiligaami toqutsisimasutut pasineqarluni tigusarineqartoq
Kalaallit Nunaanni Politiit angut 18-inik ukiulik angummik 42-nik ukiulimmik Sermiligaami toqutsisimasutut pasillugu tigusaraat.
Politiit tusagassiuutinut taama nalunaaruteqarput.
AAMMA ATUARUK Politiit Tunumi nunaqarfimmi toqutsinermik paasiniaasut
Tasiilami politiit ullumi nunaqarfimmiipput, angullu 18-inik ukiulik tigusaralugu. Politiit Sermiligaami toqutsisoqarsimasinnaaneranik ullaaq nalunaarfigineqareerneranni taamaattoqarpoq.
- Maannamut paasiniaaneq politiillu paasissutissaataat tunngavigalugit pasineqartumik tigusarinnittoqarpoq. Toqusimasoq angutaavoq 42-nik ukiulik, tigusarineqartorlu angutaavoq 18-inik ukiulik, Kalaallit Nunaanni Politiini politikommissæri Brian Thomsen oqarpoq.
Toqusimasoq angullu 18-inik ukiulik ilaquttariittut attuumassuteqartut tusagassiuutinut nalunaarummi allaqqavoq.
Qanigisaasut nalunaarfigineqareertut, politiit paasissutissiissutigaat.
Politiit suli paasiniaapput, tigusarineqartullu tigummigallarneqarnissaa siunertaralugu eqqartuussivimmut ullup ingerlanerani sassartinneqarnissaa naatsorsuutigaat.
Politiit maanna paasissutissiinerusinnaanatik paasissutissiissutigaat.