Politiit Tunumi nunaqarfimmi toqutsinermik paasiniaasut
Politiit Tunumi nunaqarfimmi Sermiligaami toqutsinermik maanna paasiniaapput.
Kalaallit Nunaata politiivini pigaartut pisortaat, Nuno Larsen, KNR-imut taama paasissutissiivoq.
Suliaq paasiniarneqarmat, annerusumik maanna oqaaseqarfigerusunngilaa. Politiit tusagassiuutinut ullup ingerlanerani nalunaaruteqarumaartut, taanna paasissutissiivoq.
Aamma Sisimiuni ilungersunartumik pisoqarpoq. Angut toqutseriarsimasutut pasineqarluni decembarip ulluisa 31-anni tigusarineqarpoq, inatsillu tunngaviusoq naapertorlugu ippassaq killisiorneqarluni. Angut ulluni 27-ni tigummigallarneqartoq, pigaartut pisortaat paasissutissiivoq.
Ukiortaami ulapittut
Politiit sineriak tamakkerlugu ulloq unnuarlu kingulleq ulapipput.
Politiit angerlarsimaffinni eqqissiviilliornernut nakuusernernullu atatillugu suli ullumi orniguttartut, Nuno Larsen oqarpoq.
Suliat aalakoornermut attuumassuteqakkajupput.
Suliat qassit ulloq unnuarlu kingullermi nalunaarutigineqarsimanersut politiit maanna oqaatigisinnaanngilaat.