Angut pisunut 27-nut pineqaatissinneqartoq, suliarli naammassinngilaq

Angut 24-nik ukiulik pisunut 27-nut qaammatini arfinilinni pinerluuteqarsimasunut inissiisarfimmiittussanngorlugu tallimanngormat eqqartuunneqarpoq. Taama Kalaallit Nunaanni Politiit ilisimatitsipput.

Unnerluutigineqartulli eqqartuussut ingerlaannaq suliareqqitassanngortippaa. Ilumut pisuunerluni Nunatta Eqqartuussisuuneqarfianit isummerfgigineqarnissaa piumasaraa. 

Angummut unnerluussissutit allattorsimaffiat imartoorujussuaq ilaatigut nakuusernermut, sioorasaarinermut, tillinniarnermut, imigassartorsimalluni biilersimanermut biilersinnaanermullu uppernarsaateqarani biilersimanermut tunngassuteqarput. Unioqqutitsinerpassuillu taakku unnerluussutinut allakkiaq naapertorlugu 2021-mi marsimit aallartipput, tassani angut Messengerikkut toqutsinissamik sioorasaarisimasutut unnerluutigineqarluni.

Unnerluussutinut allakkiaq naapertorlugu unnerluutigineqartoq ilaatigut arnamut angutaateqartoq paasereerlugu allassimavoq ’Toquttariaqarpassi. Paasiinnassavarsi. Aallaanissat nuannerunaq’.

Inuunermik arlaleriarluni sioorasaarisoq

Tassanilu kisimi sioorasaarisimanngilaq. Unnerluussissutigineqartut tallimat sioorasaarinermut tunngassuteqarput. Inuinnarnut, kisiannili aamma politiitut sulisunut.

’Politiit toqussavakka aggiinnarsinnaapput’ politiimullu unnerluussutinut allakkiaq naapertorlugu toqqaannartumik oqarsimavoq ’Meeqqat paarsasi nalunngilakka, tamarmik toqunneqassapput, sumi najugaqartusi nalunngilara. Nakkutigivassi.’

Sioorasaarinerit saniatigut nakuusersimasutut imigassartorsimallunilu biilersimasutut unnerluutigineqarpoq. 2022-mi juulimi biilersinnaanermut uppernarsaammik arsaarneqareerluni unitsinneqarpoq 2,07 promilleqarluni.

Nuummi imerniartarfimmi Maximutimi nakuusersimasutut aamma eqqartuunneqarpoq, tassani inummik unataasimallunilu kiisisimalluni.

Eqqartuussinerup kingorna politiit ilisimatitsipput, eqqartuussiviup eqqartuussinermik aalajangiinermi pingaartissimagaa, angutip assingusunik siornatigut pinerluuteqarsimanerminit eqqartuunneqarnikuusimanera, taamaammallu unnerluussisussaatitaasut pineqaatissinneqarsimasunut inissiisarfimmiitinneqarnissaanik, akiliisinneqarnissaanik minnerunngitsumillu hashimik kokainimillu eqqusseriaraluarsimasutut unnerluutigineqaatiminit arsaarinnissuteqarfigineqarnissaanik piumasaqaataat malinneqassasoq.

Unnerluussisoq akerlianik suliareqqitassanngortitsisoq

Suliami immikkut unnerluussisup Lars Petersenip suliap inernera naammagisimaarlugu eqqartuussinerup kingorna oqarpoq.

- Suliami pisuunermut apeqqummi unioqqutitsisimanerniillu pineqaatissinneqarnissaanik uuttortaanermi piumasaqaatigut tamarmik ilalerneqarnerat unnerluussisussaatitaasut naammagisimaarpaat. 

- Namminerli suliaq Nunatta Eqqartuussisuuneqarfianut suliareqqitassanngortippaa, uagullu akerlianik sukanganerusumik piumasaqarluta suliareqqitassanngortitsilluta, tamatumani Nunatta Eqqartuussisuuneqarfia sakkortunerusumik pineqaatissiinissamut periarfissikkusukkatsigu, unnerluussisoq Lars Petersen oqarpoq.

Suliaq Nunatta Eqqartuussisuuneqarfianit qaqugu suliarineqassanersoq politiinit unnerluussisumiilluunniit ilisimatitsissutigineqanngilaq.