Angut pinngitsaaliinermut peqqarniitsumut atatillugu ukiuni marlunni isertitsivimmiitussanngortitaavoq
Eqqartuussiveqarfik Sermersuumi sisamanngornermi pisumi pinngitsaaliilluni kujanninneq eqqartuussinermi qitiulluinnarpoq.
Angut 23-nik ukiulik pinngitsaaliisimasutut, persuttaasimasutut aamma pigisaik aseruisimasutut unnerluussaalluni eqqartuussivimmiippoq.
Unnerluussisup Alexander Stürup-ip unnerluussutit peqqarniitsumik pinngitsaaliinertut taavai. Eqqartuussisullu angutip pineqaatissinneqarnissaanut atatillugu annikillisaataasinnaasunik taasaqarsinnaanngilaq.
- Soorunami annersaaneq iliuusaavoq ilungersunartoq, uanili arnamut pinngitsaaliineq peqqarniitsuliornerulluinnarsimavoq. Taamaammat aamma pinngitsaaliilluni kujannissimasumut pineqaatiisaarnerup sivisussusilertarneranit sivisunerusumik pillagassanngortitaavoq, Alexander Stürup oqarpoq.
Angut pineqaatissinneqartoq Nuup Nuussuaani juunimi fiistattoqarnerani arnamik 26-inik ukiulimmik meeqqaminik ataatsimik ukiulimmik tutitaqartumik pinngitsaalillugu kujannissimavoq kannguttaatsuliorfiginnillunilu.
Suliamut atatillugu aamma angutip Danmarkimiitilluni arnaatigisimasaminik arlaleriarluni annersaasimanera matumillu Nuup Nuussuaami aseruisimanera aamma eqqarttuussutaapput. Taamaalilluni ukiuni marlunni qaammatinilu pingasuni pineqaatissinneqarsimasunut inissiisarfimmiittussanngortitaavoq.
Unnerluusisup pineqaatissiineq naammagisimaarpaa.
- Unnerluussisussaatitaasut tunngavilersuutaat pineqaatisiinissallu sivisussusissaanik kissaatai tamarmik tusaaniarneqarput.
Arnat eqqunngitsuliorfigineqartoq 120.000 koruuninik taarsiiffigineqassaaq.
Qanitamut pinngitsaaliinerunami nalusamut pinngitsaaliineruvoq
Pineqaatissiinermi sakkortusaatinut ilaavoq, qanitamut pinngitsaaliinerunani nalusamut pinngitsaaliinerummat. Pappiaranimi allassimagaluarpoq, eqqunngitsuliorfigineqartoq pinerliisorlu imminnut ilisarisimasut, Alexander Stürup nassuiaavoq.
Eqqartuussinerulli nalaani arnap angut siornatigut takunngisaannarsimagaa paasinarsivoq, naak ilaqutariittunut allassimagaluarlutik.
Taamaammat pinngitsaaliineq nalusamut pinngitsaaliinertut isigineqassasoq aalajangerneqarpoq.
- Suliami imminnut ilisarisimanngitsinnerat saqqummerpoq, naak unasissumi ilaqutariikkaluarlutik. Arnap angut ilisarisimanngilluagarimmagu suliami qanitamut pinngitsaaliinerunami nalusamut pinngitsaaliinertut suliaq nanginneqarpoq, Alexander Stürup oqarpoq.
Pinngitsaaliigamili tigummigallagaasoq
Unnerluussummi allassimasut naapertorlugit, pinngitsaalineqannginnermini arnaq 26-nik ukioqartoq politiinut ikioqqulluni sianeruttortoq, angutip arnaq toqqusassillugulu qarnga matullugu ikiortissarsiorsinnaajunnaarsarsimavaa pinngitsaalillugulu arneriffigalugu.
Arnaq pineqarnermi kingorna mattaanngarmi igalaakkut meerannguani ataatsimik ukiulik tigullugu qimaasariaqarsimavoq, anigamilu qujanartumik politiit apuuttut naammattoorlugit. Politiit ingerlaannarlutik angut tigusaraat.
- Angut taamanili tigummigallagaavoq, taamaammat eqqartuussivimmi pineqaatissinneqareerami, pineqaatissinneqarsimasunut ukiut marluk kingulliit inissiisarfimmiissutigissavai, unnerluussisoq oqaluttuarpoq. Qaammatialunni tigummigallagaareerpoq, kisianni ukiuni marlunni tassa aninngikkallassaaq, Alexander Stürup oqarpoq.
