Angut 22-nik ukiulik nakuusersimasutut pinngitsaaliisimasutullu unnerluutigineqartoq
Angut 22-nik ukioqartoq Eqqartuussisoqarfik Sermersuumi Nuummi oktobarip sisamaani sassartinneqassaaq. Angutip pisimasunut assigiinngitsunut sisamanut tunngasunut pineqaatissinneqarnissaa eqqartuussiviup anguniarpaa. Pisimasut arnanut marlunnut eqqunngitsuliorfiginnissimaneranut tunngasuupput, persuttaaneq, pinngitsaaliineq kanguttaatsuliorfiginninnerlu. Taakku saniatigut pigisanik aserorterisimasutut unnerluussassanngortitaavoq.
Unnerluussummi allassimasut naapertorlugit angutip Nuup ilaani Nuussuarmi inissiap matua 17.000 koruuneqartoq maajimi 2021-mi aserorsimavaa.
Aamma Aalborgimiitilluni januaarimi 2022-imi ullaaralaakkut arnaatikuni 37-nik ukioqartoq niaquagut persuttarsimavaa, opgangianilu eqqakattaarisimallugu.
Angutip arnaq 37-nik ukiulik qaammat qaangiummat ullup tungaagut orneqqissimavaa, matua tukkarlugu ammariarlugu arnaq tigupilooriarlugu niaquagut arlaleriarlugu annersarsimallugu.
Fiistertuni pinngitsaaliisoq
Nuussuarmi ukiormanna juunimi pisumi arnaq 26-nik ukiulik meeqqani ataatsimik ukiulik tutikkaa kanngutaatsuliorfigeriarlugu pinngitsaalillugu kujassimavaa.
Unnerluussummi allaaserineqartut naapertorlugit angutip arnaq ilaginngikkuniuk toqunniarlugu sioorasaarsimavaa. Arnaq politiinut sianeruttortoq angutip savimmik qunusaarsimavaa, ilaginngippani toqussallugu sioorasaarlugu, taamaalimmat arnap telefoni iliinnartariaqarsimavaa.
Angutip arnaq 26-nik ukioqartoq pinngitsaalillugu kujassimavaa. Arnaq mattaanngarmi meerannguani tigupallariarlugu igalaakkut qimaasimavoq, qujanartumillu politiit apuuttut naammattoorlugit.
Inissiaatileqatigiiffik sinnerlugu unnerluussisussaatitaasut, matup aserorneqartup nalinga angutip taarsissagaa piumasariniarpaat.
Arnaq 37-nik ukiulik sinnerlugu unnerluussisussaatitaasut, angutip pigisanik aserorterisimanera persuttaanerilu pillugit angutip taarsiissuteqarnissaa piumasariniarpaat.
Aamma arnaq 26-nik ukiulik sinnerlugu unnerluussisussaatitaasut, angutip sioorasaarisimaneranut pinngitsaaliisimaneranullu atatillugu 100.000 koruuninik taarsiissuteqarnissaa piumasariniarpaat.
