Angut inuusuttoq Sermiligaameersoq ataataminik toqutsisimasutut eqqartuunneqartoq
Januaarip ulluisa aallaqqaataani angut taamani 18-inik ukioqartoq angummik 42-nik ukiulimmik Tunumi nunaqarfimmi Sermiligaami toqutsisimasutut pasineqartuni tigusarineqarpoq.
Suliaq Eqqartuussisoqarfik Sermersuumi maanna suliarineqareerluni angut ukiuni marlunni qaammatinilu arfineq-pingasuni pineqaatissinneqarsimasunut inissiisarfimmiittussanngortinneqarpoq. Taanna toqutsinermik kinguneqartumik nakuusersimasutut eqqartuunneqarpoq.
Kalaallit Nunaanni Politiit tusagassiuutinut nalunaarummi taama allapput.
Suliaq angutip inuusuttup ataatanilu 42-nik ukioqartup assortuussimanerannut tunngassuteqarpoq. Kalaallit Nunaanni Politiinit unnerluussisussaatitaasoq, Marutha Thayapharan nassuiaavoq:
- Suliaq alianartorujussuuvoq, taanna ilaqutariinni oqqannermik aallaaveqarpoq. Angutilli 19-inik ukiullip ataataminik toqutsinissaminik siunertaqarneranut misissueqqissaarnermi takussutissarsisoqanngilaq.
AAMMA ATUARUK Sermiligaami toqutsineq: 18-inik ukiulik januaarip 27-anut tigumigallarneqartoq
- Nakuusernerli angutip 42-nik ukiullip toquneranut toqqaannartumik pissutaavoq, taamaammat nakuuserneq toqumik kinguneqartoq pillugu unnerluussivugut.
Naalli Marutha Thayapharanip eqqartuussut ilorrisimaarutigigaluarlugu angut inuusuttoq sivisunerusumik pineqaatissinneqarsimasunut inissiisarfimmiitsikkusuppaa, taamaattumillu suliaq nunatta eqqartuussisuuneqarfianut suliassanngorteqqillugu.
- Eqqartuussulli unnerluussisussaatitaasut piumasaqaatigisaanit sivikinneruvoq, sivisunerusumillu pineqaatissiisoqarnissaanut toqqammavissaqarsoraarput. Taamaammat suliaq Nunatta Eqqartuussisuuneqarfianut suliassanngorteqqinniarlugu aalajangerparput.
Suliap Nunatta Eqqartuussisuuneqarfiani qaammatini tulliuttuni suliarineqarnissaa naatsorsuutigineqarpoq. Angut 19-inik ukiulik suli tigummigallarneqarpoq.
Tasiilami sapaatip akunnera imaannaanngitsoq
Toqutsineq ukioq manna ullormi siullermi pivoq, tamatumalu kingorna ullut marluk qaangiutiinnartut angut 48-nik ukiulik Tasiilami inissiami toqungasoq aamma nassaarineqarpoq, taassuma inooqataa tamatuma kingunitsianngua toqutsisimasutut pasineqarluni tigusarineqarpoq.
Suliat taakku marluk pissutigalugit Tasiilami ajornartoornermi upalungaarsimaneq aallartinneqarpoq. Tarnillu pissusianik ilisimasaqartumik Tasiilap eqqaanut nunaqarfimmut Sermiligaamut angutip 42-nik ukiullip toquffigisaanut aallartitsisoqarpoq.
Tasiilami tarnip pissusianik ilisimasaqartut marluk inuunerissaasorlu qanigisaasunut ikiuunnissamut piareersimallutik.
Apriilip naanerani Tasiilami angummik toqungasumik nassaartoqaqqippoq, tassanilu inummik tigusarinnittoqarlunilu tigummigallaasoqalerpoq.
