Politiit ullormut nalunaarutaat: Angut inuusuttoq biilertilluni ajutoortoq
Angut 25-nik ukiulik biilinik Nuummi 400-rtalikkoortilluni tallimanngornermi ullaakkut arfernup missaani ajutoorpoq.
Angut taanna imigassartorsimatilluni biilersimasutut pasineqartoq, politiit ilisimatitsipput:
- Aaversinneranit inernerusut pillugit suli paasisaqanngilagut, imigassartorsimatillunili biilersimagunavippoq, Kalaallit Nunaanni Politiit pigaartuisa pisortaat Jeppe Andsager oqarpoq.
Angut taanna ajoqusersimasoq navianartorsiunngitsorli, politiit pigaartuisa pisortaata erseqqissaatigaa.
Biilinik Nuummi aqquserngit ilaanni 400-rtalimmi sapaatit akunneri kingulliit pingasut ingerlaneranni aappassaanik ajutoortoqarpoq. Inuusuttummi marluk biilinik tassuunaartillutik ungasinngitsukkut aamma ajutoorput, aappaata perulunneranik kinguneqartumik.
400-rtalik ullaaq manna matuneqarallarpoq, ingerlavigineqaqqilereersinnaallunili.
Suli uuliakoortoqartoq
Nuup Kangerluata ilaani, pineqaatissinneqarsimasunut inissiisarfiup qanittuani, uuliakoortoqartoq pingasunngornermi ullaap tungaani paasineqarpoq, tassanilu suli uuliakoortoqarmat politiit qatserisartullu suleqatigiillutik tassani suli suliaqarput.
- Suminngaanniit uuliakoortoqarneranik suli misissuivugut.
- Uuliakoortoqartoq paasineqarmalli qatserisartullu uuliakoorfiusumi suleqatigiippugut, taakkuali ilisimatitsissutaat kisiisa nalunngilagut. Taamaammat suli uuliakoortoqartoq kisiat oqaatigisinnaavara, Jeppe Andsager oqarpoq.
Nuummi qatserisartut suminngaanniit uuliakoortoqarnersoq paasisimaneraat aperiniarlugit attavigaavut.
