Angut aallaasersorluni toqutsisimasutut ukiuni qulini pineqaatissinneqarsimasunut inissiisarfimmiittusanngortinneqartoq

Angut inuusuttoq Eqqartuussisoqarfik Qaasuitsumi marlunngornermi eqqartuussinermi unnerluutigineqarpoq, taanna inuarsimasutut pissutsini allani arfineq-marlunni unnerluutigineqarpoq.

Angut inuusuttoq pinerlunnermini 17-inik ukioqartoq pillugu eqqartuussineq ullumi aalajangiiffigineqarpoq, angut ukiuni qulini pinerluuteqarsimasunut inissiisarfimmiittusanngortinneqarpoq.

Angutip angut alla 61-inik ukiulik Qasigiannguani siorna decembarip 11-ani allaallugu toquppaa, illoqarfimmilu inuit allat aamma allaaniarsimallugit.

Ukiuni qulini pineqaatissinneqarsimasunut inissiisarfimmiittussanngortitsineq, Kalaallit Nunaanni Politiit unnerluussisussaatitaasuunerata, Lars Petersenip ilorrisimaarutigilluinnarpaa.

- Suliaq ilungersunarluinnartuullunilu alianartuuvoq. Pingaartumik inunnut tamanit najuuffigineqarsinnaasumiittunut pinerluuteqarnerup sakkortunera pissutigalugu.

- Unnerluussisussaatitaasut ukiunik qulinik pineqaatissiissoqarnissaa piumasarisimavaat, ilungersunarluinnartoqarneralu tunngavigalugu eqqartuussiviup piumasaqaatigisatsinnik isumaqatigaatigut, tamannalu soorunami ilorrisimaarutigilluinnarpara, Lars Petersen oqarpoq.

Pissutsit allat arfineq-marluk

Angut inuusuttoq inuarsimasutut unnerluutigineqarnermi saniatigut siorasaarineq, toqutsinissamik siorasaaruteqarnernerit arlallit, toqutseriarnerit pingasut kiisalu nakuuserneq pillugit unnerluutigineqarpoq.

Unnerluussissut KNR-ip takunniffigisinnaalersimasaa naapertorlugu pissutsit unnerluutigineqartut tamarmik ataaseq nakuusernermut tunngasoq minillugu decembarip aqqarnani ullaakkut nalunaaqutaq qulingiluat qeqqata missaanit 09:15-ip tungaanut minutsinik 45-nik sivisussuseqartumi pipput.

Angut 61-inik ukiulik unnerluussissut naapertorlugu niaqumigut ikinnerpaamik ataasiarluni eqqorneqarluni toqutaavoq. Taanna piffissami tassani ATV-mi ilaasuuvoq.

Unnerluussissut naapertorlugu pisut Qasigiannguani festernermi pipput, tassanilu 17-inik ukiullip aallaat aariarluni festeqataasut tamarmik toqorarniarlugit siorasaarsimavai.

Tamatuma kingunitsianngu angut aallaammik inuup qamutaarartup tungaanut seqqorpoq. Eqqunngilaali. Seqqorneratali nuna inuup ungasinngisaaniittoq eqqorpaa.

Taarsiissuteqartoqarnissaa pillugu aalajangersaasartut ilanngutissasut

Unnerluussisussaatitaasut oqaatigineqartutut piumasaqaatitaqanngitsumik ukiuni qulini pineqaatissinneqarsimasunut inissiisarfimmiititsisoqarnissaa piumasaraat, tamannalu eqqartuussiviup malinniarlugu aalajangerpaa. Inissiisoqarnissaanik piumasaqarnerup saniatigut 61.000 koruuningajannik taarsiissuteqartoqarnissaa aamma piumasarineqarpoq.

Taarsiissuteqartoqarnissaanulli tunngatillugu taarsiissuteqartoqarnissaa pillugu aalajangersaasartut aalajangiissapput, eqqartuussiviummi piumasaqaat naammattumik uppernarsaaserneqanngissorigaa, Lars Petersen paasissutissiivoq.

Eqqartuunneqartup illersuisuatalu eqqartuussiviup aalajangernera Nunatta Eqqartuussisuuneqarfianut ingerlateqqinneqassanersoq pillugu sapaatini akunnerni marlunni eqqarsaatiginninnissamut piffissalerneqarput.