Qasigiannguarmiut tupaqqasut: Susoqarnersoq paasinngeqqaarparput
Qasigiannguani sapaatiummat aallaasersortoqarnerata kingorna innuttaasut tupaqqaqaat.
Angut 61-inik ukiulik illoqarfiup qeqqani aallaasersortoqarnerani toqutaavoq. Angut inuusuttoq 17-inik ukiulik tigusarineqarpoq toqutsisutullu pasineqarluni unnerluutiginneqarluni.
Pisorlu Qasigiannguani innuttaasut attortisimassutigeqigaat ajoqi Ole Madsen oqarpoq.
AAMMA ATUARUK Aallaammik toqutsineq: 17-inik ukiulik ulluni 28-ni tigummineqarallassaaq
Taanna sapaatiummat ullaap-tungaani naalagiartitsissalluni piareersaleruttornermi nalaani toqutsisoqarsimasoq kalerrinneqarpoq.
- Tupaqqanartorujussuuvoq, aamma aallaqqaammut susoqarnersoq paasinnginnatsigu. Taava aatsaat qulinngulersoq naalagiariartortut isertalereersut paasivarput, Ole Madsen oqarpoq nangillunilu:
- Politiinit kalerrinneqaratta inunnit ornittakkat tamarmik matuneqassasut angalaartoqassanngikkallarmat inunnik. Assorsuarujussuaq tupaqqavugut, taanna oqarpoq.
Aallaasersortoqarnera pissutigaugu naalagiarnissaraluaq taamaatiinnarneqarpoq.
Ole Madsen angerlarsimaffimminit suliartorluni ullaakkut arfineq-pingasut missaani anivoq. Toqutsiffiusorlu akunnialuinnaat sioqqullugit saneqquppaa, attortisimassutigaalu.
- Annilaaraluarpunga. Sioqqutsisimanngitsuuguma taama arriitsigigama ingerlaniartoq ajortumiikkanut ilaasimasinnaanera annilaarutigigaluarpara, Ole Madsen oqarpoq.
Eqqaaniaaneq ikiuigasuarnerlu
Pisumi alianartumi ataatsimooqatigiilluni ikioqatigiinnissaq aamma toqutaasup angutip 61-inik ukiullip eqqaaniarneqarnissaa pillugit Ole Madsen eqqaaniaanissamik aaqqissuivoq.
Illoqarfimmi 1.000-it sinnilaarlugit innuttaqartumi innuttaasut 300-t missaaniittut peqataapput. Tussiaqatigiittoqarpoq aamma palasip peqataaffigisaaanik.
- Malunnarpoq inunnit iluarineqarlunilu nuannarineqartoq aamma oqiliallaatigineqartoq paasinarpoq.
- Ataatsimoorsinnaaneq pingaarutilerujussuusarami taamatut nuanniitsunik aammalumi nuannersunik atugaqartilluni sumiluunniiit ataatsimoorsinnaaneq pingaaruteqartuaannartuugami. Taamaattumik assorsuaq pingaartissimavara ataatsimoornissaq, Ole Madsen oqarpoq.
Eqqaaniaanermi tussiartoqarpoq. Assiliisoq: Kristian Jeremiassen.
Qasigiannguani innuttaasut ikiuigasuarnissamik pisariaqartitsisut Kommune Qeqertalimmit isumagineqarput. Inuit qulingiluat sapaatiummat saaffiginnissimasut borgmester Ane Hansen KNR-imut ippassaq ilisimatitsivoq.
AAMMA ATUARUK Qeqertalimmi borgmesteri: Pisumit alianartumit tamatta eqqugaavugut
- Qasigiannguani illu sullivik ammarlugu pisariaqartitsisinnaasunut ammarlugu, taavalu aamma sulisugut tamarmik sapaatiummalli sulipput ulappullutik, ikiueqqarnissamut tunngasunik suliaqarlutik, Ane Hansen oqarpoq.
Angut 17-inik ukiulik ulluni 28-ni tarnimikkut napparsimasunut immikkoortortaqarfimmi tigummigallarneqassasoq Qaasuitsup eqqartuussisoqarfiata aalajangerpaa.
Tassa angut inuusuttoq taanna 18-iliineqanngitsuni tarnikkut nappaatilinnut immikkoortortaqarfimmi matoqqasumi tigummigallagassanngortitaavoq.