Qeqertalimmi borgmesteri: Pisumit alianartumit tamatta eqqugaavugut
Qasigiannguani angut 61-inik ukiulik aallaasersortoqarnerani toqutaavoq.
Angut 17-inik ukiulik, illoqarfiup qeqqani eqqarpoq.
Pisimasoq nunaqqataasunut alianartumik eqquingaatsiarpoq, Kommuni Qeqertalimmi borgmesteri, Ane Hansen taama oqarpoq.
- Tassa tamatta sakkortunaarparput. Pisimasoq alianartorujussuuvoq, aamma toqukkut qimaguttoq suleqatigigatsigu Kommune Qeqertalimmi Qasigiannguani suliffitsinni sulisuugami. Silisoq pikkorissoq, qiimasoq, suliffimminut tunniusimasorujussuaq, Ane Hansen oqarpoq.
AAMMA ATUARUK Qasigiannguani allaasersortoqarmat angut 61-inik ukiulik toquvoq
Kommuni inunnut eqqugaasunut ikiuigasuarnissaminut erngertumik iliuuseqarpoq, innuttaasullumi ikiorneqarasuarnissaminnik pisariaqartitsipput. Borgmesterip oqarnera naapertorlugu, ippassaq inuit qulingiluat saaffiginnipput.
-Qasigiannguani illu sullivik ammarlugu pisariaqartitsisinnaasunut ammarlugu, taavalu aamma sulisugut tamarmik ippassaq sulipput ulappullutik, ikiueqqarnissamut tunngasunik suliaqarlutik, Ane Hansen oqarpoq.
Kommunimi sulisut immikkut tarnip pissusianik ilisimasalimmik ikiorneqarasuarnissaminnillu aamma neqeroorfigineqarput.
-Misiginneqataanerput maanngaaniit ingerlatipparput Qasigiannguanut, borgmester Ane Hansen oqarpoq, pingasunut eqqaaniaallutik nipaallisimaartoqartoq aamma taassuma ilanngullugu oqaatigaa.
Ulluni 28-ni tigummigallagassanngortinneqartoq
17-inik ukiulik eqqalermat Kalaallit Nunaata politiivinit erngertumik tigusarineqarpoq. Taanna Eqqartuussisoqarfik Qaasuitsumi ullumi sassartinneqarpoq.
Taanna toqutsisimasutut pasineqarpoq.
Angut ulluni 28-ni tarnimikkut napparsimasut uninngavianniitinneqassasoq eqqartuussisoqarfiup aalajangerpaa.
AAMMA ATUARUK Aallaammik toqutsineq: 17-inik ukiulik ulluni 28-ni tigummineqarallassaaq
Aallaasersortoqarnerani inunnik allanik ajoqusertoqarsimaneranik politiinut nalunaartoqanngilaq. Pisorli suli misissuiffigineqarpoq.
Kalaallit Nunaanni Politiit Aasianni Ilulissanilu politiit pinerluttoqarsimaneranillu misissuisartut Danmarkimeersut misissuinerminni ikiortiseraat.