Aallaammik toqutsineq: 17-inik ukiulik ulluni 28-ni tigummineqarallassaaq
Angut 17-inik ukiulik Qasigiannguaneersoq eqqartuussivimmi ullumi nalunaaqutaq qulingiluanut sassartinneqarpoq. Taanna inuarsimasutut pasineqarluni unnerluutigineqarpoq. Angut ulluni 28-ni tarnimikkut napparsimasut uninngavianniitinneqassasoq eqqartuussisoqarfiup aalajangeraa Kalaallit Nunanni politiit KNR-mut paasissutissiipput.
AAMMA ATUARUK Qasigiannguani toqutsineq: 17-inik ukiulik killisiorneqarpoq
Angut Qasigiannguani politiit sapaatiummat tigusaraat. Angut illoqarfiup qeqqani arlaleriarluni eqqarsimaneragaavoq.
Angut 61-inik ukiulik eqqarnermi aallaaneqarnermi kingorna toquvoq.
Ukioq manna toqutsinerit arfineq-marluk
- Ukioq manna toqutsisoqarnera siulleq ukiortaami ullormi siullermi politiinut ullaaralaakkut nalunaarutigineqarpoq. Tassani angut 18-inik ukiulik Tunumi Sermiligaami ataataminut 42-nik ukiulimmut peqqarniitsumik nakuusermat angut toquvoq. Erniusoq tamatuma kingorna tamanna pillugu pineqaatissinneqarpoq.
- Ullualuit qaangiuttut angut 48-nik ukiulik Tasiilami inissiami toqungasoq nassaarineqarpoq, arnarlu 41-nik ukiulik pasineqarluni tigusarineqarluni.
- Januaarimi kingusinnerusukkut angut 57-inik ukiulik Niaqornani qoorortuumik aallaaneqarluni toqutaavoq. Pinerluuteqartoq Eqqartuussisoqarfik Qaasuitsumit eqqartuunneqarpoq.
- Arnaq 56-inik ukiulik Sisimiuni toqungasoq marsimi nassaarineqarpoq, angut inuusunnerusoq tigummigallagassanngortinneqarlunilu pasineqarpoq.
- Apriilip 26-ani unnuami Tasiilami toqutsisoqaqqippoq. Tamatumani angut 30-nik ukiulik toqutaalluni. Suliami uani angut tigusarineqarlunilu tigummigallagassanngortinneqarpoq.
Angut 42-nik ukiulik tunumi ukiortaami toqunneqarmat ukioq manna toqutsineq siulleq pivoq.
Kingullermik toqutsineq Tasiilami apriilimi pivoq, taamani angut 30-nik ukiulik toqunneqarami.
- Ukiut siuliinut sanilliullugu toqutsinerit amerlanerunerat toqutsisoqarneruleriartorneranik isumaqanngilaq, taanna oqarpoq.
Toqutsinerni taamani arfiniliusuni sisamat toqutsinivittut oqaatigineqarsinnaasut politiit isigaat.
Bjørn Tegner Bay nassuiaavoq misissuinerup takutissinnaasaraa toqutsisoqarsimanngitsoq, kisiannili toqusoqarneranut pissutaasinnaasartoq nakuuserneq aamma mianersuaalliornikkut toqutsineq.
Taassumali ataaseq erseqqissaatigerusuppaa:
- Nunatsinni toqutsisoqarneranik suliat agguaqatigiissillugit amerlassusaat innuttaasunut 56.000-inut sanilliullugit amerlavallaarujussuarput. Innuttaasut ikittunnguuvugut, taamaammat toqutsinerit ataatsimit marlunnut amerlavallaarpulluunniit, politimesteri oqarpoq.