Politiit qatserisartullu inuup timaata ilaanik nassaartoqaqqaarneraniilli misissueqqissaalerput. Toqqorsivimmit assi: Andreas Wille.Assi: KNR / Andreas Wille

Politimesteri toqutsinermi agguisoqarnera pillugu: Assingusumik nalaataqarnikuunngilagut

Angummut pillarneqaataasinnaasumik suliaqarneq sapaatip akunnerata tulliani aallartissaaq. Taanna 24-nik ukiulimmik toqutsisimasutut, agguisimasutut eqqagassallu akornannut eqqaaveqarfimmi toqqorsisimasutut unnerluutigineqarpoq.

- Kalaallit Nunaanni Politiinit Ilulissani suliatut ittumik suliaqarnikuusimanerluta eqqaamasinnaanngilara.

Politimesteri, Bjørn Tegner Bay suliaq peqqarniilluinnartoq, Eqqartuussisoqarfik Qaasuitsumi sapaatip akunnerata tulliani suliarineqartussaq pillugu oqarpoq.

Eqqartuussissutigineqartussami angut angummik 24-nik ukiulimmik toqutsisimasutut unnerluutigineqarpoq. Unnerluussissut naapertorlugu tamanna Ilulissani najukkami siorna septembarip 29-ani pivoq. Unnerluutigineqartup toqutsinermi kingorna inuup timaa aggorpaa, timillu ilai illoqarfiup ikuallaavianukaanneqartussanngorlugit eqqaaveqarfimmut ilillugit.

Ilulissani toqutsillunilu agguisoqarnera 
 

Angut toqutsisimasutut toqungasullu timaanut ileqqusaanngitsumik iliuuseqarsimasutut unnerluutigineqarpoq.

 

Taanna biilimik tillissimasututut biilernermullu allagartaqarani 2017-imi juunip aqqaneq-aappaani biilersimasutut aamma unnerluutigineqarpoq.

 

Angut Ilulissani 2020-mi februaarip 13-ianni peqqarniitsumik nakuusersimasututut aamma Nuummi pineqaatissinneqarsimasunut inissiisarfimmi 2022-mi januaarip arfineq-aappaani aamma peqqarniitsumik nakuusersimasututut aamma unnerluutigineqarpoq.

 

Tamanna KNR-ip allagaatinik takunniffigisaanik unnerluussissummi allassimavoq.

 

Suliaq Eqqartuussisoqarfik Qaasuitsumi novembarip ulluisa 21-ani, 22-ani, 23-ani 24-anilu suliarineqassaaq.

Angut toqutsisimasutut toqungasullu timaanut ileqqussaanngitsumik iliuuseqarsimasutut unnerluutigineqarpoq.

AAMMA ATUARUK Unnerluussut: Toqoriarlugu aggoriarlugu eqqaavimmut igippaa

Unnerluussisussaatitaasut angutip piffissami killiligaanngitsumi tigummineqartussanngortinneqarnissaa piumasaraat.

- Immikkut illuinnartunik toqutsinermi suliaqarnikuuvugut. Kisianni uunga assersuunneqarsinnaasunik suliaqarnikuunngilagut, Bjørn Tegner Bay oqarpoq.

- Nunatsinni toqutsinermi agguisoqarnikuuvoq, kisianni tamanna qangali pivoq. Kisianni toqungasup eqqagassat akornannut toqqorneqarnera nalaannikuunngilarput.

Nunatsinni toqutsisoqartarnera

Nunatsinni ukioq maanna toqutsinerit manna arfiniliupput. Ukiumut toqutsinerit agguaqatigiissillugit tallimaasarput.

  • Ukioq manna toqutsisoqarnera siulleq ukiortaami ullormi siullermi politiinut ullaaralaakkut nalunaarutigineqarpoq. Tassani angut 18-inik ukiulik Tunumi Sermiligaami ataataminut 42-nik ukiulimmut peqqarniitsumik nakuusermat angut toquvoq. Erniusoq tamatuma kingorna tamanna pillugu pineqaatissinneqarpoq.
  • Ullualuit qaangiuttut angut 48-nik ukiulik Tasiilami inissiami toqungasoq nassaarineqarpoq, arnarlu 41-nik ukiulik pasineqarluni tigusarineqarluni.
  • Januaarimi kingusinnerusukkut angut 57-inik ukiulik Niaqornani qoorortuumik aallaaneqarluni toqutaavoq. Pinerluuteqartoq Eqqartuussisoqarfik Qaasuitsumit eqqartuunneqarpoq.
  • Arnaq 56-inik ukiulik Sisimiuni toqungasoq marsimi nassaarineqarpoq, angut inuusunnerusoq tigummigallagassanngortinneqarlunilu pasineqarpoq.
  • Apriilip 26-ani unnuami Tasiilami toqutsisoqaqqippoq. Tamatumani angut 30-nik ukiulik toqutaalluni. Suliami uani angut tigusarineqarlunilu tigummigallagassanngortinneqarpoq.

Taamaakkaluartorli Bjørn Tegner Bayip toqutsinerit “amerligaluttuinnarsorinngilai”.

- Ukiut siuliinut sanilliullugu toqutsinerit amerlanerunerat toqutsisoqarneruleriartorneranik isumaqanngilaq, taanna oqarpoq.

- Ukioq manna toqutsinermi arfinillit misissuiffigalugit aallartinneqarnikuupput. Taakkunanngalu sisamaannaat toqutsinivittut oqaatigisinnaavagut. Toqutsinermi assigiinngitsumik ineriartorsinnaavoq, tamanna toqutsisoqarneratut inerneqanngissinnaalluni. Toqusoqarneranut pissutaavoq, nakuusernerusinnaavoq. Aamma mianersuaalliornikkut toqutsinerusinnaavoq. Aamma ajunaarneq pineqarsinnaavoq, politimesteri oqarpoq.

 

Politimesteri Bjørn Tegner Bay. Assi: KNR

 

Taassumali ataaseq erseqqissaatigerusuppaa:

- Nunatsinni toqutsisoqarneranik suliat agguaqatigiissillugit amerlassusaat innuttaasunut 56.000-inut sanilliullugit amerlavallaarujussuarput. Innuttaasut ikittunnguuvugut, taamaammat toqutsinerit ataatsimit marlunnut amerlavallaarpulluunniit, politimesteri oqarpoq.

Siorna oktobarip aallaani aallartittoq

Ilulissani toqutsisoqarnera pillugu suliaq siorna oktobarip aappaani aallartippoq, tassanimi inuup timaata ilaa Ilulissani ikuallaavimmi nassaarineqarpoq.

Ullut pingasut qaangiuttut inuup timaata ilaa alla nassaarineqarpoq.

Politiit qatserisartullu ikuallaavimmi ulluni arlalinni paasissutissarsiorlutik ujaasipput. Suliami peqqarniilluinnartoqarnera pissutigalugu Kalaallit Nunaanni Politiit Danmarkimit ikiorneqarput, pinerluttoqarneranik misissuisartut toqusullu timaanik misissuisartut toqutaasup kinaassusaanik qanorlu toqusimaneranik misissuiartorlutik Ilulissanukarput.

AAMMA ATUARUK Politiit Ilulissani toqutsinermik misissueqqissaarnertik naammassigaat

Pasineqartup saniatigut inuit allat marluk aamma tigusarineqarput.

Ataaseq tigusarineqarnermi aquagu iperagaaqqippoq. Alla – arnaq – ulluni pingasuinnarni tigummineqarallariarluni aamma iperagaavoq. Taakku arlaat suliamut atatillugu pasineqaratillu unnerluutigineqanngillat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl