Politiit Ilulissani toqutsinermik misissueqqissaarnertik naammassigaat

Ilulissani ikuallaavimmi inuup timaata ilaanik nassaartoqarneranit ukioq ataasinngorluinnangajalerpoq.

Timip ilaa sulisumit nassaarneqarpoq, taannalu eqqagassat ikuallanneqartussat akornanniittuulluni.

Angut taamani 28-nik ukiulik suliamut atatillugu pasineqarpoq, politiillu suliamik misissueqqissaarnertik maanna naammassivaat.

- Politiit misissueqqissaaqqissanngillat. Suliamut atatillugu pasineqartoq tarnimigut misissortipparput. Tassa taanna siulliulluni tigusarineqarlunilu pasineqartoq kingornalu tigummigallarneqartussanngortinneqartoq, Kalaallit Nunaanni Politiit unnerluussisussaatitaasuat, Marutha Thayapharan KNR-imut oqarpoq.

Tarnikkut misissuineq qanoq takussutissiinersoq oqaatigisinnaaviuk?

- Suliamut pasineqartumullu atatillugu tarnikkut misissuinerup qanoq takussutissiinera pillugu oqaaseqarsinnaanngilanga.

AAMMA ATUARUK Ilulissani toqutsineq: Politiit eqqarsartaatikkut misissuinerup naammassineqarnissaa utaqqigaat

Toqutsisoqarnera pillugu suliap eqqartuussivitsigoortinneqarnissaanut unnerluussisussaatitaasut maanna unnerluussissuteqarsinnaalerput, taamaalillunilu eqqartuussuteqartoqarsinnaalissalluni.

- Eqqartuussivimmi suliaq novembarimi sapaatip akunnerani 47-mi pinissaa unnerluussisussaatitaasunit naatsorsuutigaarput. Eqqartuussineq Ilulissani pissaaq, Marutha Thayapharan oqarpoq.

Katillugit pingasut tigusarineqartut

Inuup timaata ilaanik Ilulissani ikuallaavimmi siorna oktobarip ulluisa aappaanni arfininngornermi nassaartoqarpoq.

Ullut pingasut qaangiummata timip ilaanik nassaartoqaqqippoq.

Politiit qatserisartullu ikuallaavimmi takussutissanik ulluni arlalinni misissueqqissaarput.

Suliaq peqqarniitsumik aallaaveqarmat Kalaallit Nunaanni Politiit Danmarkimut ikiortissarsiorput. Pinerluttoqarsimatillugu toqusunillu misissuisartut Ilulissanut toqunneqarsimasup kinaaneranik qanorlu toqusimaneranik misissuiartorput.

Angutillu politiinit tigummigallarneqartup saniatigut inuit allat marluk aamma tigusarineqarput.

Taakkunannga ataaseq tigusarineqarnermi aqaguani iperagaavoq. Allalu – arnaq – ulluni pingasuinnarni tigummigallarneqariarluni iperagaavoq.

Marutha Thauapharanip taakku suliamut atatillugu qanoq attuumassuteqarnerat suli oqaaseqarfigisinnaanngilaa, taakkuli aamma unnerluutigineqassanerarlugit.