61-inik ukiulik aallaaneqarluni toquvoq: Suliaq eqqartuussivitsigut suliarineqartussanngortoq

Angut taamani 17-inik ukioqartoq Qasigiannguani illoqarfiup qeqqani arlaleriarluni eqqaassimmat angut 61-inik ukiulik 2022-mi decembarip 11-ani aallaaneqarpoq.

Angut 61-inik ukiulik unnerluussissut KNR-ip takunniffigisaa naapertorlugu niaquatigut ikinnerpaamik ataasiarluni eqqorneqarpoq, tamannalu toqqutigalugu.

Maanna pisoqarneranit ukioq ataaseq qaangiulluinnalersoq suliaq eqqartuussivitsigoortinneqalerpoq. Eqqartuussivimmi suliaq Eqqartuussisoqarfik Qaasuitsumi decembarip aqqaneq-aappaani aallartissaaq.

Angut unnerluutigineqartoq pissutsinik arfineq-pingasunik unnerluutigineqarpoq, taakkunanngalu pissutsit arfineq-marluk 2022-mi decembarip aqqarnani pisuupput.

Angut siorna sapaammi kingunipiloqartussamik aallaammik aalleriarluni festimi najuuttut tamaasa toqunniarlugit sioorasaaruteqarsimasutut unnerluutigineqarpoq.

Unnerluussissut naapertorlugu festimi najuuttumut ”aamma illit toqussavakkit”-mik oqarsimavoq.

Eqqaminut eqqartoq

Unnerluussut naapertorlugu angut minutsit 15-it missaasa kingorna aallaammik Savage Remington kal. 22-250-imik meqqilimmik pissarseriarluni inuup meerartaqartumik qamutaarartup tungaanut igippoq.

Nunali eqqorpaa.

Tamatuma kingorna unnerluutigineqartoq”naak tamakku toqutassakka”-mik suaartarsimavoq, qulinillu ikinnerunngitsunik 61-inik ukiullip ATV-mi ilaasup tungaanut eqqarluni.

Angutip ATV-mik ingerlatsisoq aamma eqqoriarsimagaluarpaa, tamannali iluatsinngilaq, ATV-millu aquttoq napparsimmaviup tungaanut ingerlavoq.

Angut pissutsinik arlalinnik sioorasaarinermut, toqutseriarnermut tunngassuteqartunik aamma unnerluutigineqarpoq, unnerluussissullu naapertorlugu inuit marluk tungaanut eqqarsimagaluarpoq, taakkuli illuminnut qimaasimapput.

Ukiuni qulini pinerluuteqarsimasunut inissiisarfimmiitsinneqassasoq piumasarigaat

Angut inuit allat marluk peqatigalugit inummut tilluaasimasutut isimmittaasimasutullu aamma unnerluutigineqarpoq. Tamanna 2022-mi februaarip 27-anni pisimasuuvoq.

Unnerluussisussaatitaasut piumasaqaatitaqanngitsumik ukiuni qulini pineqaatissinneqarsimasunut inissiisarfimmiittussanngortitsisoqarnissaa anguniarpaat.

Tamatuma saniatigut pinerliiffigineqartut, sioorasaarneqartut sinnerlugit 60.822,23 koruuninik taarsigassiisoqartitsiniarput.

Aamma angutip 61-inik ukiullip qimataanut taarsiiviginnittoqarnissaa piumasariniarpaat. Uanili aningaasat qanoq amerlatiginersut  allassimanngilaq.