Angut 45-inik ukiulik Arsummi toqutsisimasutut pasineqarluni tigummigallarneqartoq
Angut 45-inik ukiulik Arsummi toqutsisimasutut pasineqarluni ulluni 28-ni tigummigallagassanngortinneqarpoq.
Kalaallit Nunaanni Politiit taama nalunaaruteqarput.
Politiit nunaqarfimmi Arsummi pasinartumik toqusoqarsimanera pillugu marlunngornermi unnukkut nalunaaqutaq 22.24 nalunaarfigineqarput. Angut 58-inik ukiulik toqungasoq nassaarineqarmat kommunefogedi peqqinnissamillu suliaqartoq najukkamut erngertumik ornigutsinneqarput. Taakku ikiueqqaaraluarput iluaqutaanngitsumilli.
AAMMA ATUARUK Angut toqungasoq Arsummi nassaarineqartoq
Politiit toqusoqarnerani pissutsit pillugit toqutsisoqarsimanissaanik pasitsaassaqarput. Misissueqqissaartartut sisamat Nuummiit qulimiguulimmik ippassaq ullaakkut Arsuliartinneqarput.
45-inik ukiulik toqutsisimasutut pasineqarluni tigusarineqarpoq – taannalu maanna ulluni 28-ni tigummigallagassanngortinneqarluni.
Ukioq manna arfinilissaat
Suliaq matuni matoqqasuni ingerlanneqarpoq, politiillu piffissami matumani annerusumik paasissutissiisinnaanngillat.
58-inik ukiulik toqutaasorineqarsorineqartoq ukioq manna toqutsinerit imaluunniit nakuusernerup kingunerani toqusut arfinilissaraat. Ukiumut toqutsinerit agguaqatigiissillugu tallimaasartut, Ritzau allappoq.
Ukioq manna toqutsinerni siulleq ukioq manna ullormi siullerpaami pivoq. Taamani 18-inik ukiullip ataatani 42-inik ukiulik Tunumi Sermiligaami peqqarniitsumik nakuuserfigalugu toquppaa. Erniusoq tamanna pillugu pineqaatissinneqarluni eqqartuunneqarpoq.
Ullualuit qaangiuttoq angut 48-inik ukiulik Tasiilami inissiami toqungasoq nassaarineqarpoq, arnarlu 41-nik ukiulik pasineqarluni tigusarineqarpoq.
Angut 57-inik ukiulik Niaqornani qoorortuumik aallaaneqarluni januaarimi toqutaavoq, tassani tigusarinnittoqarlunilu toqutsisutut pasinnittoqarpoq.
Arnaq 56-inik ukiulik Sisimiuni toqungasoq marsimi nassaarineqarpoq, angut inuusunnerusoq pasineqarlunilu tigummigallarneqarpoq.
Tasiilami apriilip ulluisa 26-anni allamik aamma toqutsisoqarpoq. Tassani 30-nik ukiulik toqutaavoq. Angummi tassani tigusarinnittoqarlunilu tigummigallaasoqarpoq.