Tasiilami angut toqungasoq nassaarineqarpoq: Toqutsisutut pasisaq tigusarineqarpoq 

Ataasinngornerup unnuaani Tasiilami angut toqungasoq nassaarineqarpoq, politiit pisoq toqutsisoqarsimaneratut nalilerpaat, angullu toqutsisutut pasisaq tigusaralugu.
Tasiilami politiit toqutsinermut atatillugu aqqusineq Naasuliartarpiip aqqulaa assersorpaat. Assi © : Merete Lindstrøm, KNR
Allattoq Signe Haahr Pedersen , Karline Platou
apriilip 26-at 2022 07:20

Tasiilami angut toqungasoq unnuaq, tassa: ataasinngornerup marlunngornerullu unnuaani nassaarineqarpoq, angullu toqutsisimasutut pasineqartoq Kalaallit Nunaata politiivinit tigusarineqareersoq politiit allapput.

Politiit unnuaq nalunaaqutaq marlunut illoqarfiup iluani najukkat ilaanni toqungasumik nassaartoqarsimaneranik kalerrinneqarput.

AAMMA ATUARUK Eqqartuussisuuneqarfik: Nunatsinni toqutsisoqarnerani pineqaatissiisarneq sakkortunerulersinneqarsinnaavoq

- Politiit takkunnerminni takusaat toqutsisoqarsimaneranut naapertuummata, ilumut toqutsisoqarsimanera uppernarsarsinnaagitsik, Kalaallit Nunaanni politiit tusagassiutinut nalunaarumminni allapput.

Assersuipput

Tusagassiutinut nalunaarummi itinerusumik paasissutissiisoqanngilaq, tassa toqusimasup toqutsisimasutullu pasisap kikkuunerannik paasissutissaasinnaasunik.

AAMMA ATUARUK Sisimiuni toqutsineq: Angut sapaatit akunnerni sisamani tigummigallarneqassasoq

Oqaatigineqarporli Tasiilami Naasuliartarpiip aqqutaa assersorneqarsimasoq, Danmarkimilu toqusoqarsimatillugu misissueqqissaarisartut attavigineqarsimasut.

- Politiiniit innuttaasut qinnuigerusuppagut politiit eqqissillutik sulinissaat pillugu aqqummut assersorneqarsimasumut ataqqinneqqullugit, politiit pisoq pillugu maannakkuugallartoq annertunerusumik oqaaseqarusunngikkallartut taama allapput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk