Sisimiuni toqutsineq: Angut sapaatit akunnerni sisamani tigummigallarneqassasoq

Angut inuusuttoq arnamik inuartarinnittutut pasineqarluni sapaatit akunnerini sisamani tigummigallarneqassasoq Eqqartuussisoqarfik Qeqqata aalajangerpaa.

Angut eqqartuussivimmut ullumi sassartinneqarmat taama pisoqarpoq.

Kalaallit Nunaanni politiit pinerluttoqarsimaneranik paasiniaasartut pisortaat Jan Lambartsen KNR-imut taama paasissutissiivoq.

AAMMA ATUARUK Angut inuusuttoq toqutsisutut pasineqartoq

Sisimiuni Kaaleeqqap Aqqutaani arnaq toqungasoq sisamanngornerup ullaatungaani siumorneqarpoq.

Arnap toqutaasimaneranik pasitsaanneqarmat politiit suliaq toqutsisoqarsimasutut misissuiffigilerpaat. Sisamanngornerup ingerlanerani angut inuusuttoq tigusarineqarpoq, taannalu tassa maanna sapaatit akunnerni sisamani tigummigallagassanngortinneqarpoq.

- Sapaatini akunnerni sisamani tigummigallaqqusinermik kaammattuinerput eqqartuussiviuk malippaa. Suliatsinnillu ingerlalluarnitsinnik taanna takussutissaavoq, Jan Lambertsen oqaproq.

Angummik pasineqartunik eqqartuussivimmut sassartitsineq matoqqasuni ingerlanneqarpoq.

Tamaammat politiit eqqartuussivimmi sassartitsinermi suut eqqartorneqarsimanersut paasissutigisinnaanngikkaat Jan Lambertsen nassuiaavoq.

Politiit suliami misissuinermini inuit arlallit suli killisiortussaavaat.

Angut toqutsisimasutut pasineqartoq Sisimiuneersuuvoq.