Sisimiuni toqutsineq: Politiit angummik tigusarinnipput
![](/sites/default/files/styles/image_934x467/public/article_images/foto_sisimiut.jpg?itok=zHy3YAbk)
Sisimiunit toqutsisoqarneranut atatillugu angut sisamanngornermi tigusarineqarpoq.
Kalaallit Nunaanni Politiit KNR-imut taama paasissutissiipput.
Tigusarineqartoq pillugu politiit annertunerusumik oqaaseqarusunngillat, angulli tigusarineqartoq killisiorneqassaaq tamatumalu kingorna aalajangerneqassaaq inatsit tunngaviusoq naapertorlugu killisiorneqassanersoq.
Pineqartoq tassaavoq arnaq toqungasoq, Sisimiuni Kaaleeqqap Aqqutaata eqqaani sisamanngormat nassaarineqartoq.
AAMMA ATUARUK Politiit Sisimiuni toqusoqarnera toqutsisoqarsimaneratut misissuiffigigaat
Politiit sisamanngornermi ullup qeqqata siorna nalunaarfigineqarput, suliarlu toqutsisoqarsimaneranik paasiniaaffigineqalerluni.
- Arlaannik malunnartoqarpoq, pinerluffigineqartumilu arlaannik peqarpoq, maannalu paasisagut aallaavigalugit qulakkeerluta oqaatigisinnaavarput peqquserluttuliortoqarsimasoq tassalu toqutsisoqarsimasoq, pinerluttoqarsimaneranik paasiniaasartut pisortaat Jan Lambartsen oqarpoq.
Arnaq kinaanersoq annerusumik taassuma oqaatigerusunngilaa.
- Pinerluttoqarsimaneranik paasiniaaneq eqqarsaatigalugu arnap kinaanerata qulakkeerneqarnissaa utaqqivarput, tamatumalu kingorna qanigisaasut kalerrinneqarnissaat.
Taamaattumik paasissutissanik annerusunik tunniussaqarsinnaanngilagut pinerluffigineqartoq eqqarsaatigalugu, Jan Lambartsen oqarpoq.