Eqqartuussisuuneqarfik: Nunatsinni toqutsisoqarnerani pineqaatissiisarneq sakkortunerulersinneqarsinnaavoq
Nunatta Eqqartuussisuuneqarfia angummik 28-nik ukiulimmik Aasianni niviarsiaqqamik arfinilinnik ukiulimmik 2020-mi toqutsisimasumik ippassaq eqqartuussivoq.
Nunatta Eqqartuussisuuneqarfiata eqqartuussiviup ukiuni arfineq pingasuni pineqaatissinneqarsimasunut inissiisarfimmiittussanngortitsineq ukiunut qulingiluanngortippaa. Eqqartuussisuuneqarfiup toqutsinermi pissutissaqartoqannginnera meeqqallu toqutaanera pineqarmat tamanna pingaartuutippaa.
Tamatuma saniatigut toqutsineq Aasianni tamanit orninneqarsinnaasumi pinera sukannernerulersitsivoq.
- Ataatsimut isigalugu suliap kiisami naammassineqarnera nuannaarutigaara, Christian Halstad suliami unnerluussisussaatitaasuusoq oqarpoq.
- Aasianni innuttaasut suliaq una pillugu toqqissimanngissimasut kisianni aamma pingaartumik ilaqutaasut qimagaasut sinnerlugit naammassinera nuannaarutigaara. Suliamit matumani tamanna pingaarnerpaasoraara, unnerluussisussaatitaasoq oqarpoq.
AAMMA ATUARUK Angut niviarsiaqqamik toqutsineq pillugu ukiuni qulingiluani pineqaatissinneqarsimasut inissiisarfimmiissasoq
Unnerluussisussaatitaasut toqutsinermi nunatsinni pineqaatissiissutigineqarsinnaasumik sivisunerpaamik tassa ukiunik qulinik pineqaatissiisoqarnissaa piumasaraat. Illersuisullu ukiut arfinilinnit arfineq-marlunnut piumasaralugu.
- Sivikinnerulaarnissaa neriuutigigaluarparput, taamali inerneqanngilaq, soorunami tamanna illersukkannut pakatsinarpoq, Finn Meinel suliami illersuisuusoq oqarpoq.
Illersuisoq unnerluussisussaatitaasorlu: Nunatsinni ukiunik qulingiluanik pineqaatissiineq sakkortuvoq
Toqutsisimasumut pineqaatissiinerup qaffasinnerunera immikkut ittuuvoq, eqqartuussutimmi ukiunik arfinilinnik nalinginnaasumik sivisussuseqartaraluarput.
Tamanna illersuisup unnerluussisussaatitaasullu oqaatigaat.
- Siusinnerusukkut pillaatigineqartartunit ilisimasatsinnit sukannernerungaatsiarpoq, Finn Meinel oqarpoq.
- Ukiunik qulingiluanik pineqaatissiineq suliani ukunani suliarinikuusimasatsinni qaffasinnerpaat ilagaat, Christian Halstad oqarpoq.
Nutaarluinnaasoq
Eqqartuussut pissutigalugu nunatta eqqartuussisuuneqarfiata nunatsinni toqutsisoqarnerani pineqaatissiissutitut eqqartuussutigisartagaa nalinginnaasoq allanngortinneqarpoq. Tunngaviusumik ukiunik arfinilinnik pineqaatissiisoqartartoq tunngaviusoq maanna ukiunut arfineq-marlunnut qaffanneqarpoq.
- Maluginiartara Nunatta Eqqartuussisuuneqarfiata suliami uani Nunatsinni toqutsinermut pineqaatissiissutip qaffasissusiata nalinginnaasumik qaffanneqarnera oqaatigigaa. Toqutsinermut tunngatillugu ukiunik arfinilinnik sivisussuseqarnera siornatigut misigisaqarfigereernikuuarput. Tamannalu ukiunut arfineq marlunut maanna qaffanneqarpoq. Paasinnittaasera malillugu nalinginnaasumik pineqaatissiinerup qaffasissusiata sakkortunerulersinneqarnera Nunatta Eqqartuussisuuneqarfianit oqaatigineqarpoq, taama Christian Halstad oqarpoq.
Taamaattumik siunissami toqutsisimanerup kingunerisaanik suliassanngortitassanut aalajangeeqataalluni sunniuteqassaaq. Tamanna nunatta eqqartuussisuuneqarfiata eqqartuussummik eqqortuutitsinermini ippassaq aamma pingaartuutippaa.
- Nunatta Eqqartuussisuuneqarfiata politikerit pillaanerup sakkortunerulersinneqarnissaannik kissaateqarnerat naalaarsimallugu oqaatigivaa. Politikerit kissaataannik naalaarsimanermik tunngaveqarpoq, taamalu kingorna sakkortunerulersitsisoqarluni. Siunissamut tunngavissiilluni suliassanut pilersitassanut naliliineruvoq, tamannalu nutaarluinnaavoq, nunatta illersuisuunera Finn Meinelip oqarpoq.