Angut niviarsiaqqamik toqutsineq pillugu ukiuni qulingiluani pineqaatissinneqarsimasut inissiisarfimmiissasoq
Nunatta Eqqartuussisuuneqarfiata angutip niviarsiaqqamik aqqanilinnik ukiulimmik 2020-mi novembarimi toqutsinini pissutigalugu qanoq sivisutigisumik pineqaatissiissuteqarfigineqassanera ullumi aalajangiiffigaa.
Eqqartuussiveqarfiup ukiuni arfineq-pingasuni pineqaatissinneqarsimasunut inissiisarfimmiittussanngortitsinissaq aalajangernikuuaa. Nunatta Eqqartuussisuuneqarfiata eqqartuussut taanna sakkortusillugu ukiunik qulingiluanik sivisussuseqartussanngortippaa.
Kalaallit Nunaanni Politiit tusagassiuutinut taama paasissutissiipput.
Unnerluussisussaatitaasup, Christian Halstadip suliaq unnerluussisuuffigaa, taassuma Unnerluussisussaatitaasut sivisunerpaamik pineqaatissiissutigineqarsinnaasoq tassa ukiut qulit piumasariniaraat oqaatigereernikuuaa.
Illuatungaanili nunatta illersuisuunerata, suliami illersuisuusup, Finn Meinelip pineqaatissiissutigineqartup ukiunut arfinilinnit arfineq-marlunut sivikillineqarnissaa piumasaraa.
Nunatta Eqqartuussisuuneqarfiatali eqqartuussut sakkortusillugu pineqaatissinneqarsimasunut inissiisarfimmiittussanngortinneqarnera ukiunit arfineq-pingasunit qulingiluanut sivitsorpaa.
Eqqartuussivik: Ukiut arfineq-pingasut sakkortuvoq
Nunatta eqqartuussisuuneqarfiata piffissamik aalajangiinertaa taamaallaat ullumikkut aalajangiiffigisussaavaa.
Aalajangerneq taanna unnerluussisussaatitaasup illersuisullu Nunatta Eqqartuussisuuneqarfianut suliassanngortippaat. Angut pinerlunnini pissutigalugu ukiuni arfineq-pingasuni pineqaatissinneqarsimasunut eqqartuussiveqarfimmit inissiisarfimmiittussanngortinneqarnikuuvoq. Suliami tassani angut piffissami tassani 28-nik ukioqartoq niviarsiaqqamik 2020-mi novembarimi toqutsisutut pisuutinneqarpoq.
AAMMA ATUARUK Angut 28-nik ukiulik niviarsiaqqamik aqqanilinnik ukiulimmik toqutsisimasutut eqqartuunneqartoq
Eqqartuussisoqarfik Qaasuitsup eqqartuussummik aalajangiinermini angut 28-nik ukiulik toqutsinissamik siunertaqarsimasinnaanera suliami pingaartuutippaa.
Tassa angutip iliuutsini niviarsiaqqap toqussutigissagaa ilisimasimassagaa.
Tamatuma saniatigut pineqaatissiissutip sivisussusaa sukannersuuvoq. Eqqartuussiveqarfik angut niviarsiaqqamik pissutissaqarani toqutsisimasoq isumaqarpoq, angutillu inersimasuunera niviarsiaqqallu meeraanera aamma pingaartuutinneqarpoq.
Eqqartuussiveqarfimmi eqqartuussisut marluk ukiunik arfineq-pingasunik pinerluuteqarsimasunut inissiisarfimmiitsitsisoqarnissaa aalajangerpaat, eqqartuussisullu pingajuata ukiunik arfineq-marlunnik pineqaatissiisoqarnissaa aalajangerlugu. Eqqartuussut taasisut amerlassusaat aallaavigalugu aalajangerneqarpoq.
