Nunatta eqqartuussisuuneqarfiata toqutsinermut ukiunik arfineq-pingasunik eqqartuussut aalajangiiffigissagaa
Nunatta Eqqartuussisuuneqarfiata angut niviarsiaqqamik aqqanilinnik ukiulimmik Aasianni toqutsinini pissutigalugu qanoq sivisutigisumik pinerluuteqarsimasunut inissiisarfimmiittussanngortinneqassanersoq ullumi aalajangiiffigissavaa.
Suliaq tamanna Ilulissani Eqqartuussiveqarfik Qaasuitsumi decembarimi suliarineqarpoq. Angut piffissami tassani 28-nik ukioqartoq niviarsiaqqamik toqutsisutut suliami tassani pisuutinneqarpoq.
AAMMA ATUARUK Angut 28-nik ukiulik niviarsiaqqamik aqqanilinnik ukiulimmik toqutsisimasutut eqqartuunneqartoq
Angut pinerlunnini pissutigalugu ukiuni arfineq-pingasuni pineqaatissinneqarsimasunut inissiisarfimmiittussanngortinneqarpoq. Aalajangerneq taanna unnerluussisussaatitaasup illersuisullu Nunatta Eqqartuussisuuneqarfianut suliassanngortippaat.
Unnerluussisussaatitaasup sivisunerpaamik pineqaatissiisoqarnissaa kissaatigigaa
Unnerluussisussaatitaasup sivisunerpaamik pineqaatissiissutigineqarsinnaasumik ukiuni qulini pinerluuteqarsimasunut inissiisarfimmiittussanngortitsisoqarnissaa eqqartuussivimmi anguniarpaa.
Aalajangiinissamillu kissaateqarneq taanna Unnerluussisussaatitaasut nunatta eqqartuussisuuneqarfianut aamma aalajangertikkusuppaat. Tamanna Unnerluussisussaatitaasup, Christian Halstadip KNR-imut nassuiaatigaa.
- Ilulissani eqqartuussiveqarfimmi suliap isumagineqarnerani aamma oqaatigivarput, suliaq ilungersunaqimmat sivisunerpaamik pineqaatissiissummik tassa ukiunik qulinik pineqaatissiisoqarnissaa kissaatigaarput, unnerluussisussaatitaasoq, Christian Halstad oqarpoq.
Illersuisoq: Ukiunit arfineq-pingasunit sivikinnerusoq
Illuatungaanit suliami illersuisup, Finn Meinelip ukiunit arfineq-pingasunit sivikinnerusumik pineqaatissiissuteqartoqarnissaa kissaatigaa.
- Ukiunik arfinilinnit arfineq-marlunut piumasaqaatigaarput, taanna KNR-imut oqarpoq.
Taassuma toqutsisoqarnerani nalinginnaasumik ukiunik arfinilinnik pineqaatissiisoqartarnera innersuussutigaa.
Eqqartuussivimmi suliap suliareqqinneqarnera qulingiluanut aallartissaaq, ullormilu ataatsimi suliarineqarnissaa aalajangersimavaat. Tassa nunatta eqqartuussisuuneqarfiani ullumi kingusinnerusukkut eqqartuussutip suaarutigineqarnissaa naatsorsuutigineqarpoq.
Tassa nunatta eqqartuussisuuneqarfiata piffissamik aalajangiinertaa taamaallaat aalajangiiffigissavaa. Taamaammat Nunatta Eqqartuussisuuneqarfiata angut pisuunersoq pisunnginnersorluunniit aalajangiiffigissanngilaa.
Pineqaatissiissutip sivisussusaa sukannersoq
Eqqartuussisoqarfik Qaasuitsup angut 28-nik ukiulik toqutsinissamik siunertaqarsimasinnaanera suliami pingaartuutippaa.
Tassa angutip iliuutsini niviarsiaqqap toqussutigissagaa ilisimasimassavaa.
Tamatuma saniatigut pineqaatissiissutip sivisussusaa sukannersuuvoq.
Eqqartuussiveqarfik angut niviarsiaqqamik pissutissaqarani toqutsisimasoq isumaqarpoq, angutillu inersimasuunera niviarsiaqqallu meeraanera aamma pingaartuutinneqarpoq.
Eqqartuussiveqarfimmi eqqartuussisut marluk ukiunik arfineq-pingasunik pinerluuteqarsimasunut inissiisarfimmiitsitsisoqarnissaa aalajangerpaat, eqqartuussisullu pingajuata ukiunik arfineq-marlunnik pineqaatissiisoqarnissaa aalajangerlugu. Eqqartuussut taasisut amerlassusaat aallaavigalugu aalajangerneqarpoq.
