Angut 28-nik ukiulik niviarsiaqqamik aqqanilinnik ukiulimmik toqutsisimasutut eqqartuunneqartoq

Angutip 28-nik ukiullip Aasianni siorna novembarip ulluisa 26-anni niviarsiaqqamik aqqanilinnik ukiulimmik toqutsisimasutut pasineqarnera pillugu ullumi eqqartuussisoqarpoq.

Angut niviarsiaqqamik toqutsisimasutut eqqartuunneqarpoq ukiunilu arfineq-pingasuni pineqaatissinneqarsimasunut inissiisarfimmiittussanngortinneqarluni. Taama eqqartuussineq taasinikkut aalajanerneqarpoq. Eqqartuusseqataasut marluk 28-nik pineqaatissinneqarsimasunut inissiisarfimmiinnissaa ukiullip ukiunik arfineq-pingasunik sivisussuseqasasoq taavaat, eqqartuusseqataasullu pingajuata ukiunik arfineq-marlunnik sivisussuseqarnissaa taallugu.

Eqqartuussiviup suliami unnerluutigineqartup toqutsinissani siunertarisimagaa ilimanartoq ilaatigut tunngavilersuutigaa. Allatut oqaatigalugu eqartuussivik oqarpoq, iliuutsini niviarsiaqqap toqqutigissagaa ilisimasimassavaa.   

Tamatuma saniatigut unnerluutigineqartoq niviarsiaqqamik toqutsinissamut pissutissaqanngimmat kiisalu 28-nik ukiulik aqqanilinnik ukiulimmit anginerungaatsiarmat pillaanissamik naliliinerup sukannersuunera eqqartuussiviup pingaartuutippaa.

Illersuussisoq unnerluussisussaatitaasorlu suliamik suliassanngortitseqqinniarnerlutik eqqarsaatigissallugu piffissaqarput. Taakku akissuteqarnissaminnut ullunik 14-inik periarfissaqarput.

Siunertarineqarsimanersoq pillugu apeqqut

Pisumi siunertaqartoqarsimanersoq pillugu apeqqut eqqartuussiviup aalajangiiffigisassaraa qitiusuusoq. Tassa unnerluussisussaatitaasut tunngavilersuutigisaatut 28-nik ukiulik niviarsiaqqqap toqunnissaanik siunertaqarsimanersoq imaluunniit 28-nik ukiulik toqumik kinguneqartumik nakuusersimanersoq.

Unnerluussisussaatitaasullu suliamik ingerlatsisup, Christian Halstadip maanna eqqartuussaaasimalertoq toqutsinissamik siunertaralugu iliuuseqarsimasoq qularutiginngilaa.

- Suliami pissutsinik iliuutsit saammarsaataasumik utoqqatsissutissartaqanngillat, Christian Halstad eqartuussisunut saqqummiussinermini oqarpoq, nangillunilu:

- Meeqqamik ilisarisimanngisamik toqutsineq iliuuserineqarsinnaasuni ajornerpaavoq. Taamaammat unnerluussisussaatitaasut sivisunerpaamik, tassa ukiuni qulinik pineqaatissiinissaq anguniarpaat.

28-nik ukiullip illersuisua illua tungiliisumik tunngavilersuivoq, illersukkani niviarsiaqqamik toqutsinissaminik siunertaqarsimanngitsoq tunngavilersuutigaa.

Illersuisup tassunga atatillugu 28-nik ukiullip suliami nassuiaateqarnera ilaatigut innersuussutigaa. Angutip nakuusersimanini eqqartuussinermi ippassaq nassuerutigaa, nakuusernerminili niviarsiaqqamik toqutsinissamik siunertarisimannginnerarlugu.

- Nakuuserneq toqumik kinguneqartoq pillugu taamaallaat eqqartuussisoqarsinnaasoq isumaqarpunga, illersuisoq, Finn Meinel, eqqartuussivimmi oqarpoq.

Unnerluutigineqartoq eqqartuussisup eqqartuussisooqataasullu marluk siunersioqatigiikkiartunnginneranni naggasiutaasumik oqaaseqarnissamik periarfissinneqarpoq.

Niviarsiaqqap angajoqqaavinut Aasiannilu innuttaasunut tamanut utoqqatserusulluni tassani oqarpoq.

Niviarsiaqqap arnaa nassuiaateqartoq

Niviarsiaqqap arnaa, ilisimannittutut unnerluussisussaatitaasunit aggersagaalluni, aamma nassuiaateqarpoq.

Taassuma panini ikinngutiminut pinnersaammik siorna novembarip ulluisa 26-anni tunniussiartornissamut isumaqatigiissuteqarsimasoq nassuiaatigaa. Ikinngutigiit taakku tatsip eqqaani naapinniarlutik isumaqatigiissimapput, ikinngutaasulli aqqanilinnik ukiulik takkussimanngitsoq angajoqqaaminut oqaatigisimavaa.

Niviarsiaqqap arnaa unnuk taanna panimi oqarasuaataanut sianerniartarsimagaluarluni oqaluttuarpoq, oqarasuaalli attaveqarsimanngilaq.

Anaanaasup angut 28-nik ukiulik ilaquttami panimmiluluunniit siornatigut ilisarisarisimanngikkaat aamma uppernarsarpaa.

Eqqartuussaasup pinerluuteqannginnermi niviarsiaraq imminit aningaasanik ippasssaq piumasimanerarpaa, anaanaasulli nassuiaateqarnerani taama pisoqarsimanissaanut takussutissaqanngilaq.

- Taamaaliorneq ajorpoq. Uagutsinnit ilisarisimanngisaminiilluuniit aningaasanik qinuneq ajorpoq, anaanaasoq eqqartuussivimmi oqarpoq.

Eqqartuussiviup ukiuni arfineq-pingasuni pineqaatissinneqarsimasunut inissiisarfimmiitsitsinissamik eqqartuussuteqarnermi saniatigut 28-nik ukiulik niviarsiaqqap angajoqqaavinut immikkut 100.000 koruuninik aamma taarsiissuteqartussanngortippaa.