Angut toqungasoq Arsummi nassaarineqartoq

Politiit angut 58-inik ukiulik toqutaasimasoraat.
Misissueqqissaartartut sisamat Nuummiit qulimiguulimmik Arsuliartinneqarput. Taakkulu ullaaq siusissukkut tikipput. Poliitit oqarnerat naapertorlugu taakku sumiiffimmi suli suliaqarput. Assi © : Christina Christensen
Allattoq Nutaarsiassaqartitsivik / Nyhedsredaktionen
aggustip 31-at 2022 10:21

Angut 58-inik ukiulik toqungasoq Arsummi nassaarineqarpoq, toqutaasimanissaa politiit ilimatsaappaat.

Kalaallit Nunaanni Politiit pasinartumik toqusoqarsimaneranik ippassaq unnukkut nalunaaqutaq 22.24 nalunaarfigineqarput.

Kommunefoged peqqinnissamillu suliaqartut najukkamut angummik 58-inik ukiulimmik nassaarfiusumukarput.

Angut toqungavoq, ikiueqqaarnerlu iluaqutaanngilaq.

Kalaallit Nunaanni Politiit tusagassiuutinut nalunaarummi allapput.

Misissueqqissaartartut sisamat Nuummiit qulimiguulimmik Arsuliartinneqarput. Taakkulu ullaaq siusissukkut tikipput. Poliitit oqarnerat naapertorlugu taakku sumiiffimmi suli suliaqarput.

Politiit oqarnerat naapertorlugu ilisimannittut nassuiaateqarneri pinerluffimmilu pissutsit pillugit suliaq toqutsinertut misissuiffigineqarpoq.

Angut 45-inik ukiulik tigusarineqarpoq toqutsisutullu pasineqarluni. Taanna Nuummi ualimut eqqartuussivimmut sassartinneqassaaq.

Angutip 58-inik ukiullip ilaqutai toqusoqarnera pillugu kalerrinneqarput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk