Angititaq Motzfeldt tupappoq: Kunngissamit ilisarineqarpoq
Ivalu Grønvold siullioqqugaluarpaa. Taamaattorli Angititaq Motzfeldt 18-inik ukiulik – Kalaallit Nunaannit qaaqqusani marluusuni siulliulluni – Ataqqinartorsuarmit Dronningimit tikilluaqquneqarpoq.
Pissangasorujussuulluni dronning Margrethe sikiffigaa assammillugulu.
Kingorna Angititaq Motzfeldt Kunngissaq Frederimmit, Kunngissap nulianit Marymit kingullertullu unnummi pingaarnertut inuttaasumit nalliuttumit Prins Christiaammit, Danmarkimi, Kalaallit Nunaanni Savalimmiunilu ukioqatiminik 200-nik qaaqqusisimasumit tikilluaqquneqarpoq.
Isiginnaartartunit sapaammi toqqaannartumik malinnaaffigineqarsinnaasumut tamanna unnummut ingasallunilu nuannersumut aallarniutaasoq, Angititaq Motzfeldt nassuiaavoq.
Kunngissap eqqaamavaa
Pingaartumik Kunngissaq Frederimmik naapitsineq, ikinngutinnersumik Angititaq Motzfeldtip tunuanik pattalaarisoq, immikkut misigisaavoq.
- Ilisarimmanga tupinnaqaaq. Narsami takugatta eqqaamaneriga (Kunngissaq Frederiup, aaqq.) aperivaanga, Angititaq Motzfeldt pisup aqaguani KNR-imut oqaluttuarpoq.
Ilanngullugu oqarpoq kunngissaq ataatanilu ikinngutigiittut.
Kunngikkormiut nerersuarneranni suut sassaalliutigineqarnersut ilisimaqqissaanngikkaluarlugit Angititaq Motzfeldtip oqarnera naapertorlugu nerisassat kusanarluinnartuusimapput.
Tamanna Ivalu Grønvoldimit uppernarsarneqarpoq, nassuiaatigalugu aalisagaaqqanik pinnersarneqarsimasunik siuleqqiutitorsimallutik, kukkukuuaqqamillu naatsiiaarartalimmik pingaarnertut sassaallerfigineqarsimallutik. Qaaqqusat kaageeqqanik kingulerartorput.
- Siuleqqiut soqutiginngilara taamaammat nungunngilakka, Ivalu Grønvold nassuerpoq.
Sassaalliutigineqartorli pingaarneq mamarsaatigineqarpoq. Taanna kingulerarlugu nungullugit nerineqarput.
Kunngikkormiut nereqatigalugit
Københavnimi nukappiaqqat erinarsoqatigiit Københavns Drengekor DR-illu niviarsaqqat erinarsoqatigiivi balkonngimit tusarnaartitsipput. Avatangiisit assigalugit misigisaq tamanna alutornartoq, Ivalu Grønvold nassuiaavoq ilanngullugulu oqarluni aatsaat taamak kusanarluinnartigisumiissimalluni. Misiginissaanut periarfissinneqarami uppererpiarsinnaasimanngilaa.
Angititaq Motzfeldt aamma taamak alutorsartigaaq.
- Imigassartaqanngikkaluarluni energeqartorujussuuvoq. Assut nuannerpoq, Angititaq Motzfeldt oqarpoq, ilaatigut Kunngissaq Frederimmik Kunngissallu nulianik Marymik nerriveqateqarsimasoq.
Kunngissamik kunngissallu nulianik sooq nerriveqateqartinneqarsimanerluni Angititaq Motzfeldtip ilisimanngilaa.
- Paasitinneqanngilanga. Aallaqqaammut sanilerisussaagikka naluara. Nerrivimmi atinut allagartaqaraluarpoq kisianni takunngilakka. Allat oqarmata issiaqatigissagigut aatsaat paasivara. Pissangaammernaqaaq, nassuiaavoq.
Kalaallit Nunaannik nuannarinnittoq
Pissanganinili iperarpaa.
- Nuanneqaaq. Oqaasissaqaqaat nipangiivinngillat. Kalaallit Nunaanni qanoq massakkut innersoq, aputinereersimanersoq ilaatigut aperaannga.
- Mary oqarpoq pania Kalaallit Nunaanniinnikuunngisaannartoq. Maryp Kalaallit Nunaat nuannareqaa. Kalaallit Nunaat paniminut takutikkusuppaa naluaali qaqugu tamanna pisinnaassanersoq, Angititaq Motzfeldt oqaluttuarpoq.
Kalaallit Nunaannit inuusuttut taakku marluk qinnuteqartorpassuit akornannit toqqarneqarput.
Namminersorlutik Oqartussani Air Greenlandimilu ilinniartut toqqaatinneqarsimapput. Air Greenland angalanissamut billettinik tunniussipput Namminersorlutillu Oqartussat unnuinernut aningaasartuutit isumaqalugit.
Angititaq Motzfeldt aamma Ivalu Grønvold nunatsinnut uterlutik marlunngornermi aallassapput.
