Ivalu Grønvold illussaarsuarmut nalliuttorsioriaqataassaaq

Kunngikkormiutut Ataqqinassusillip, Prins Christiaap 18-inik ukioqalerluni inuuissiornini nalliuttorsiutiginiarlugu qaaqqusaminut ukioqatiminut 200-nut matut ammarpagit, Kalaallit Nunaanniit aallartitatut Angititaq Motzfeldt Narsameersoq aamma Ivalu Grønvold Aasianneersoq qaaqqusanut ilaassapput.

KNR-ip Ivalu Grønvold oqaloqatigaa, taannalu kunngikkormiutut ataqqinassusillip inuuissiornissaanut piareersimarsimavoq:

- Piareersarsimavunga, kjolemik pisiaqareerpunga kimmikkaanillu, Ivalu Grønvold oqarpoq.

Qanormi allatut piareersaateqarpit?

- Piareersarpunga aamma ilinniarpara soorlu dronningimut qanoq aqussiimissanerlunga, ataqqinninnermik takutitsinissannut piareersartarpunga taavalu iluamik nerinissannut, Ivalu Grønvold Aasianneersoq oqarpoq.

Taanna prins Christianip 18-iliinissaanut atatillugu nunatsinnit peqataasussat marluk aapparaat. Angititaq Motzfeldtimi Narsameersoq aamma peqataassagami.

Ukioqatini 200-t allat qitigiaqatigissavai

Prins Christian 18-inik ullumi ukioqalerpoq, ukioqatiminillu Danmarkimeersunik, Kalaallit Nunaanneersunik Savalimmiuneersunillu Christiansborgimi nalliuttorsiornissamut 200-t missaannik qaaqqusaqarluni.

Unnullu eqqissisimasuni atussallugu Ivalu Grønvoldip naatsorsuutigaa:

- Naatsorsuutigaara eqqissisimaarujuussasugut nereqatigiilluta, inuillu nutaat naapinnissaat, aamma naatsorsuutigilaarpara prins Christianikkut oqaloqatiginissaat, piumagunik, assut pissangavunga, Ivalu Grønvold, Aasianneersoq, KNR-imut oqarpoq.

Inuusuttut marluk qinnuteqartut arlallit akornanni toqqagaapput. Namminersorlutik Oqartussani aamma Air Greenlandimi ilinniartut peqataasussanik toqqaasuupput.

Air Greenland timmisartornissamut aningaasaliivoq. Namminersorlutillu Oqartussat angalanermi unnuinernut aningaasartuutit akilissavaat.