Assit takukkit: Angititaq Ivalulu illussaarsuarmut persuarsioqataajartortut

Kunngikkormiusut ataqqinassusilik Prins Christian sapaammi 18-iliilluni inuuissiorpoq. Danmarkimi, Kalaallit Nunaanni Savalimmiunilu ukioqatini 200-t Christianborg Slotimi nalliuttorsiornissamut taamaammat qaaqqusimavai. 

Taakkununnga ilaapput nunatsinneersut marluk. Angititaq Motzfeldt Narsameersoq aamma Ivalu Grønvold Aasianneersoq.

Nalliuttorsiornissaq sioqqullugu Ivalu Grønvold KNR-imut oqarpoq, kunngikkormiunut qanoq pissusilersornissaminik piareersarsimalluni. 

- Ataqqinninnermik qanoq takutitsisoqartarnersoq qanorlu iluamik nerisoqartarnersoq piareersarsimavakka. Kimmikkaaqarluni aamma qanoq pisuttoqartarnersoq ilinniarpara, Ivalu Grønvold oqarpoq.

Kalaallit Nunaannit inuusuttut taakku marluk qinnuteqartorpassuit akornannit toqqarneqarsimapput. Namminersorlutik Oqartussani Air Greenlandimilu ilinniartut toqqaatinneqarsimapput. Timmisartornissamut billettit Air Greenlandimit tunniunneqarput unnuinermullu aningaasartuutit Namminersorlutik Oqartussanit isumagineqarlutik.

Dronningip oqalugiarnera

Sapaammi assuarluni kunngikkormiuni nerersuarnermi dronning Margrethep tikilluaqqusilluni oqalugiarnermini prinsip qanoq atugassaqartitaanera oqaatigaa.

- Inuuiit ulloq pingaaruteqarpoq. Danskit inuusuttut allat assigalugit inersimalerputit allaassuteqarlunilu, dronningi oqarpoq.

- Inuuninni aqqutissat aalajangerneqareerpoq ullummi ilaanni ataatat malittussaavat. Ukiuni hunnorujukkaani oqaluttuarisaanermi sivisuumi katinngataasimasumut ilaalissaatit.

Dronning Margrethep ilanngullugu oqaatigaa, tamanna peqqarniippalussinnaasoq kisiannili aamma ”sumut ingerlasussaanermik ilisimanninneq toqqissisimanarsinnaasoq ".

- 18-inik ukioqalerlutit inuuissiornivit nuannersumik nalliuttorsiorpaluttumillu ullorsiutigineqarnera ukiorpassuarni pitsaasumik inuuneqarnissamut aallarniutaagili, dronningi oqarpoq.

Oqalugiarnerup kingorna prins Christiaat pingasoriarluni inuummersoqquneqarpoq.