Angerlarsimaffeqanngitsuuneq: Inuk nammineq piumassutsiminik angerlarsimaffeqanngitsutut inuunermik misiliivoq
- Ulluni taakkunani misigissutsit sakkortoqaat ingammik pisorujoorluni qiialluni sumukarfissaqarnani ilaa juullilernerani igalaat ersittorujussuugamik soorlu takusinnaallugit inuit pilluarpasittut kialaamiittut tamakkua aamma takullugit attortinnarsuaarput.
Inuk Højgaard Nuummi angerlarsimaffeqanngitsutut misigisani pillugit attortisimalluni oqaluttuarpoq.
Taassuma sumi nerinissani, sumi unnuinissani imaluunniit sumi kialaarnissani nalullugu Nuummi silaannarmi inuuneq sapaatip akunnerani misigisassarsiorfigaa.
Nammineq kajumissutsiminik misilippaa. Inuk Højgaardimi angerlarsimaffeqarpoq, taassumali angerlarsimaffeqanngitsut isiginiarneqarulernissaat inuppalaarfigineqarnerulernissaat aamma inuit nalinginnaasut akisussaasullu isiginiarnerulersinnissaat anguniarlugu Nuummi sapaatip akunnerani angerlarsimaffeqanngitsuuneq misiginiarlugu aalajangerpoq.
Misigisaalu aamma sakkortullunilu qiianarpoq.
- Ullormut pingaartinnerpaasarpara kialaarnissaq sumi anguniarlugu, pingaartingaarakku nerisarnerluunniit puigorlugu, taanna oqarpoq.
- Nerinissaq siulliunngilaq kialaarnissaq siulliuvoq, taanna paasivara aamma, Inuk Højgaard oqarpoq.
Isikkua nakkaqataanartoq
Misigisaali tassunga kisimi sakkortunngilaq, anaanaanut, Dorthie Kanuthsenimut aamma sakkortuvoq, taassuma ernini pillugu ernumanera ullut tamaasa annertusiartorpoq.
- Animmat aa tassa sapaatip akunnera kisianni nammineq misigivissorlugit assaa nukinnik atuinaq, atuinarsuataarpoq toqqissisimananngitsorujussuuvoq, taanna oqarpoq.
Dorthie Kanuthsenip ernini Nuummi aqqusinermi takullatsiarsimavaa, takusanilu ajornerarpaa.
- Takullatsiarpara sivikitsuarakasimmik isikkua ajorpoq. Nakkaqataanarpoq, soorlu pikkunartorsiortoq takullugu aamma tassunga isumaalunnikka uppernarsisutullusooq ikkai, taanna oqarpoq.
Inuk Højgaardip sapaatip akunnerani nillertumiilluni qiiallunilu misigereerlugu angerlarsimaffimminut toqqissisimanartumut angerlaqqissinnaavoq, nunatsinnili angerlarsimaffeqanngitsut taama iluatsitsilluartiginngillat.
2022-mi kisitsineq naapertorlugu nunatsinni angerlarsimaffeqanngitsutut inuusut 491-it suli kiassarnissaqaratik, nerisassaqaratik siniffissaqaratillu inuupput. Tamannalu iliuuseqarfigineqassasoq, Inuk Højgaard isumaqarpoq.
- Angerlarsimaffeqanngitsut takuniarneqanngippallaarput, soorlu uagut angerlarsimaffilinniit nikagisaapput, taavalu soqutigineqanngippallaaqaat, Inuk Højgaard angerlarsimaffeqanngitsutut misigisaminik YouTubekkut saqqummersitsinissaminik pilersaaruteqartoq oqarpoq.
Iliuusissiaq angerlarsimaffeqanngitsunut iluaqutaassasoq
2022-mi angerlarsimaffeqanngitsunik kisitsinerup kingorna naalakkersuisut 2023-mi angerlarsimaffeqanngitsut pillugit iliuusissiaq 'Kikkut tamarmik pitsaasumik inuuneqarsinnaatitaapput' pilersippaat, tassani angerlarsimaffeqanngitsunik angerlarsimaffeqanngitsuujunnaarsitsinissaq siunertarineqarpoq.
Ilisimatusarfimmit suliniut 'Ilaassaagut' ukioq manna 4,8 millionit koruuninik aningaasaliiffigineqarpoq. Suliniummi nunatsinni tamarmik angerlarsimaffeqanngitsut pillugit suleqatigiinnerup pitsanngorsarneqassaaq, taannalu 2026-p tungaanut atuutissalluni.
