Angalasut mittarfiup utaqqisarfiani unnuisariaqarsimasut: Piareersimanerusariaqarput
Qulimiguulimmik sapaatit akunnerata naanerani arfininngornermi Tasiilaliartussat 27-t aallaliivillutik pujormat Kulusup mittarfianiit ingerlariaqqinneq ajulerput.
Taakkunannga qulit akunnittarfimmi Hotel Kulusummi ilaalu allat ikinngutiminni nalunngisaminniluunniit unnuipput.
Allalli Hotel Kulusuk ulikkaarmat siniffinni patitsittakkani sinillutik mittarfiup utaqqisarfiani unnuisariaqarsimapput.
Aviaja Ikila Abelsen Tasiilaliarlutik angalasut Kulusummi pujormat ingerlariaqqinneq ajulertunut ilaavoq:
- Mittarfiup utaqqisarfiani unnuisitaagatta siniffinni patitsittakkani sinippugut. Tamatta immikkut franskhotdogimik ataatsimik pølsemillu aappaluttumik ataatsimik unnukkorsiutissatsinnik tunineqarpugut, taanna KNR-imut oqarpoq.
Kulusummiit aatsaat ingerlariaqqinneq ajulertoqanngimmat taamaattoqaqqerataannaanissaanut piareersimanerusoqannginnera Aviaja Ikila Abelsenip tupigusuutigaa:
- Tasiilami mittarfiliulersaartoqanngippat Kulusummut tunngatillugu piareersimanerusariaqarput.
- Aatsaat taamaattoqalinngilaq. Nuanninngilaq. Kulusummiit ingerlariaqqinneq ajulertunut unnuiffissarpassuaqanngitsoq nalunngilaat, taamaammat arlaatigut pitsaanerusumik piareersimanerusariaqannginnerpat?
Napparsimasumik angallassisoqarmat ingerlariaqqinneq ajulertut
Silarlunnissaa ilimasaarutigineqaraangat angallassinissaraluanik taamaatitserusunnerusarlutik, Air Greenlandip tusagassiisartua Inga Dora G. Markussen KNR-imut oqarpoq.
Qulimiguulimmilli Tasiilaliartussat napparsimasumik angallassisoqareersorlu pujornera peqqutaalluni ingerlariaqqinneq ajulerlutik unnuisariaqarsimapput.
Qulimiguulik Kulusummut utersinnaasimanngilaq, taamaattoqartillugulu umiatsiamik angallassisartussatut Air Greenlandip isumaqatigiissuteqarfigisaa maniilarsuaqaqimmat angallassisinnaasimanngilaq.
Air Greenlandili ingerlariaqqinneq ajulertut pitsaasumik atugaqarnissaannik sapinngisamik qularnaarinninniarsimasoq, Inga Dora G. Markussen erseqqissaavoq:
- Spaghetti bolognesenik pølsinillu nunngutinik akunnittarfimmiit nerisaqartitaassasut ilisimatinneqarpugut. Kulusummili nerisassaqarujussuanngilaq, umiarsuarlu tikittussaq Tasiilamiit ingerlariaqqinneq ajulermat kinguartoortoq, Inga Dora G. Markussen oqarpoq.
- Aatsaat taama pisoqalinngilaq. Taamaammallu siorna marsimi silarloqattaareernerata kingorna qanoq iliuuseqarpugut. Mittarfeqarfiit suleqatigilluarpavut, Kulusuup mittarfia sermernarfiusuni timmisartunut sermiiaateqartarpoq, siniffinnik patitsittakkanik qipinnillu pisiortorpugut, Tasiilami heliporti qullilersorpoq aamma umiatsimik ngallassisartorlu isumaqatigiissusiorpugut.
Air Greenland ingerlariaqqinneq ajulertunik unnuiffissaqartitsinissamut nerisaqartitsinissamullu akisussaasuusoq, Mittarfeqarfiit attavigigatsigit ilisimatitsipput. Air Greenlandili ikioqqulluni saaffiginnippat ikiuuteriaannaallutik, aamma ilisimatitsipput.
