Allakkat kinguaattoortut ikinnerusut: Air Greenland timmisartumik sillimmatissamik pissarsisoq
Tusassimmi nassiussai qaammatini tallimaannarni sapaatip akunnikkaartumik sisamariarlutik kinguaattoorput.
Qaammatini tallimaannarni sapaatip akunnikkaartumik sisamariarlutik kinguaattoorput.
Nunarput tamakkerlugu allakkanik ingerlassassanillu isumaginnittumi pissutsit taamaapput.
Allakkat 3 tonsimik oqimaannerusut sapaatip akunnerinik pingasunit amerlanerusunik kinguaattoorutigineqarsimasut sapaatip akunnerata siuliani nalunaarutigaa.
- Timmisartukkut angallassineq kinguaattoorutaanerpaavoq. Tamannalu Air Greenlandip naammattunik timmisartoqanngineranik pissuteqaannarpoq, Tusassimi digitaliusumik niuernermut nassiussuinermillu piareersaanermi aqutsinermilu pisortaq, Lars Borris Pedersen oqarpoq.
AAMMA ATUARUK Allakkat avannaani apuunnaveertut: Mariep akiligassani kinguaattoorutigigai
- Atuisartutsinnut paasissutissisinnaajumalluta qaammatit arfinillit kingulliit ingerlaneranni arlaleriarluta akissutissarsiorpugut, nunatsinnilu sumiiffinni tamani kinguartoortoqarpoq, Tusass tusagassiuutinut nalunaarummi allappoq.
Tamanna sunniuteqarluarsimarpasippoq.
Air Greenlandilumi timmisartukkut angallassassat pillugit ilungersuuterpassuit pitsanngorsarniarlugit oqaloqatigiilerput.
Timmisartoq nutaaq, nassiussalereriaaseq nutaaq avammullu attaveqarneq pitsaanerusoq. Taakku pingasut Air Greenlandip allakkat, nassiussat ilaasussallu kinguaattoorutigisarnerpassuinik iluarsiiniarnermini piffissami aggersumi pitsanngorsarniassavai.
Tassalu Air Greenlandimi iluatsikkiartortoqarpasippoq.
Timmisartunik eqqussivimmi timmisartoq sillimmat
- Nunatsinni timmisartuussinermi atugassamik allamik timmisartussarsinissamut akuersissutissarsivugut. Taamaalilluta timmisartuussisarnigut patajaannerulerlutillu qajannaannerulerput, Air Greenlandip niuernermut pisortaa, Henrik Søe oqarpoq.
Air Greenland timmisartumik Dash-8-mik nassiussanut ilaasussanullu atortagassamik pissarsissaaq. Kinguaartooqattaarnerimmi Tusassimuinnaq taakkulu atuisuinuinnaq eqquineq ajorput.
- Ilaasutsinnummi aamma ajornartorsiutaapput. Taamaammat timmisartumik, timmisartuutitsitut allatulli, nassiussanik ilaasunillu assartuissutaasinnaasumik pissarsivugut.
Henrik Søe-ip oqarnera naapertorlugu timmisartoq nutaaq Air Greenlandip timmisartuisa allat teknikkikkut ajoquteqarlutik timmisinnaanngikkaangata aatsaat atorneqartassaaq.
Nassiussalereriaaseq nutaaq attaveqatigiilluarnerunerlu
Air Greenland tamatuma saniatigut nassiussalereriaatsimik nutaamik atuilerniarsarivoq, taassumalu ukiup 2023-p affaani siullermi piareersimanissaa naatsorsuutigineqarpoq.
- Nassiussalereriaatsimi nutaami allakkat nassiussallu sumiinnerat malinnaaffigilluarsinnaanerulissavarput. Tamannalu Tusassimut sullissinitsinni unammillernartitatta ilagivaat. Nassiussat sumut killinnerannut taavalu A-mit B-mut nuussimanersut maanna malinnaaffigisinnaanngilarput, Henrik Søe oqarpoq.
AAMMA ATUARUK Coronamik ajornartorsiuteqarnermi allakkat poortukkallu timmisartukkut nunatsinnut nassiunneqartassasut
Taassuma Air Greenlandip sullitanut pitsaanerusumik attaveqartalernissaa sulissutigisaasoq aamma oqaatigaa. Pitsaasumimmi attaveqarneq pitsaasumik atassuteqalersitsisarpoq.
- Tusassimut attaveqarnerput pitsaanerusinnaaqaaq. Tusass atuisuminut paasissutissiilluarsinnaaneruniassammat attaveqatigiinnitta pitsaanerulersinissaa sulissutigaarput, Air Greenlandip niuernermut pisortaa, Henrik Søe oqarpoq.