Allakkat avannaani apuunnaveertut: Mariep akiligassani kinguaattoorutigigai

Qasigiannguani Kangaatsiamilu innuttaasut ilaasa allagarsiassatik nassiussallu utaqqikatappaat.

Kangaatsiami Marie Joelsen Jeremiassen aamma Qasigiannguani Jens Vetterlain, allagarsiassaminnik utaqqerujussuartarlutik oqaluttuarput.

- Qaammat sinnersinnaasarpaa tikinniaasaarnerannik. Allakkat oqinnersiungaasarpasipput malunnarpoq taanna kisianni poortukkat, soorli akiligassat, kinguaattooqqapput. Allagarsisarpugut akileeqqusissutit takkussuutilereertut, Kangaatsiamiu Marie Joelsen Jeremiassen oqarpoq.

Allakkanik poortukkanillu Qasigiannguarmiut aamma utaqqipput. Qasigiarmiu Jens Vetterlain oqaluttuarpoq.

- Timmisartukkut poortukkanik Qasigiannguanut tikittoorniartarnerput ukiut tamaasa ajornartorsiutaavoq. Umiarsuaq ingerlaartillugu ajorpallaarneq ajoraluarpoq. Biilinut kingoraartissat januaarimili allatsitakka suli tikinngillat.

Allakkat ukiuunerani Ilulissanut unittoortaqqunagit allanik periarfissarsiornissaq ujartorpaa.

- Diskolinep angallatinngui ukiuunerani atorlugit, allakkat uningaannaleraangata, apissipallanneqarsinnaagaluarput, Jens Vetterlain oqarpoq.

Nassiussat 500 kilot

Allakkanik poortukkanillu imaatigut maannakkut assartuussisinnaanatik Tusass allakkatigut akissuteqarluni allappoq.

- Amerlasuut naammagittaalliornerat paasisinnaavarput, naammagittarlutillu nerisassanik nutaanik, ilaasunik nassiussanillu utaqqimmata, uggornaqaarlu maannakkut sikuunera peqqutigalugu imaatigut angalasoqarsinnaanngimmat. Tusassimi digitaliusumik niuernermut logistikimullu pisortaq Lars Borris Pedersen allappoq.

Kisianni Air Greenlandi allakkanik poortukkanillu assartuussisartoq nassuiaatissaqarpoq.

Allakkat poortukkallu ilaat assartorneqareersut sinnerilu apuutilersut, Air Greenlandimi tuniniaanermut assartuinermullu pisortaq Heinrich Duko Sørensen oqarpoq.

Poortukkat allakkallu 300 kilop missaaniittut maanna Aasianniittut, allallu 245 kilo Ilulissaniittut sapaatiuppat tamakkerlugit apuunnissaat pilersaarutaasoq, Lars Borris Pedersen oqarpoq.

Air Greenlandili aamma unammillernartuutitaqarpoq. Avannaami sikummat, inuussutissat, umiarsuit apuussinnaajunnaagaat, siulliullugit qulimiguulimmik assartorneqartut, taanna oqarpoq.