- Ataatsimeeqatigiinnermi ajunngittorujussuarmik ingerlavugut.

Naalakkersuisoq, Ane Lone Bagger (S) danskeq suleqatigisaq Jeppe Kofod (Soc) peqatigalugu amerikamiut nunanut allanut tunngasunut ministeriannik, Mike Pompeomik ataatsimeeqateqareernerminni taama oqarpoq.

Danskit nunanut allanut tunngasunut ministeriata amerikami suleqatigisamik ataatsimeeqateqartarnera qaqutigoortuunngilaq, kalaallimilli naalakkersuisumik ataatsimiinnermi siullermi aatsaat siullermeertumik ilaasoqarpoq.

Ataatsimiinnermi immikkoortuni oqaluuserisassani issittoq ilaavoq. Danskit nunanut allanut tunngasunut ministeriata Savalimmiut Nunarpullu nunanut allanut tunngasunut sillimaniarnermullu politikkimi sunniuteqarnerulernissaat neriorsuutiginikuuaa. Tamanna nunat marluk ukiualunni kissaatigisarisimavaat.

AAMMA ATUARUK Ane Lone Baggerip Pompeo naapileraa

- Kalaallit Nunaat issittorlu pillugu oqaloqatigiinninniarnermi ataatsimeeqatiserimmatigut assorsuaq iluarisimaarparput, Ane Lone Bagger oqarpoq.

Suna oqallisigaasiuk?

- Nuannaarutigisorujussuuarput naalakkersuisuninngaanniit qallunaat naalakkersuisuisa oqariartuutiginikuusaat naligiimmik kunngeqarfiup iluani naalagaaffeqatigiinnerup iluani suleqatigiinnissamik oqariartornertik attammassuk, naalakkersuisoq oqarpoq.

Pituffimmi kiffartuussinissamut isumaqatigiissutit

Pituffimmi kiffartuussinissamut isumaqatigiissutit kalaallinut sulisartunut suliffeqarfinnullu iluaqutaassasut Ane Lone Baggerip ataatsimiinnginnermi erseqqissaatigaa.

- Uani pingaartillugu eqqaasimavarput uangut mittarfimmik nunamik attartortitsisuugatta, kalaallit inuiaqatigiivinut kalaallinullu annerpaamik iluaqutaanissaa oqariartuutigeqqipparput, Ane Lone Bagger oqarpoq.

AAMMA ATUARUK Nunarput pissaanilissuarnit ukkatarineqartoq: Iluaqutigisinnaavarput

Tamatumanillu Jeppe Kofodip taperserpaa.

- Amerikamiut peqataanerulernerat Kalaallit Nunaannut iluaqutissartaqarnerusinnaallunilu iluaqutissartaqassasoq qitiusumik oqariartuutigineqassaaq, Jeppe Kofod ataatsimiinnginnermi oqarpoq.

- Kalaallit Nunaat peqatigalugu amerikamiunut Issittup Kalaallit Nunaatalu ineriartortinnissaanut angusaqarfiulluartumik oqaloqatigiippugut. Nunap inissisimaneranut politikikkut soqutiginnittoqaleraluttuinnarnerani amerikamiut ukkatarinninnerat akuunerallu annertusiartortoq aamma takuarput, Kofod oqarpoq.

Nunarput sammineqangaatsiartoq

Nunarput piffissami matumanerpiaq USA-mit ilaatigut ukkatarineqangaatsiarpoq.

Amerikamiut sinniisaat qasseerpassuusut amerikamiut illersornissamut ministereqarfianeersut sillimaniarnermullu siunnersuisooqatigiineersut qaammat kingulleq Nuummut tikeraarput. Amerikamiut nunanut allanut tunngasunut ministereqarfiani atorfillit qaffasinnerpaarpaat, Thomas Ulrich Brechbuhl aamma tikeraaqataavoq.

AAMMA ATUARUK Ilisimatusartut ujartuisut: Kalaallit Nunaat Issittoq pillugu periusissiortariaqarpoq

Aammattaaq amerikamiut sinerissami alapernaarsuisuini naalakkat qaffasinnerpaartaat Karl Schultz nunatsinnut qaammat kingulleq tikeraarpoq.

Amerikamiut Danmarkimi aallartitaqarfianit tusagassiuutinut nalunaarut naapertorlugu admiralip, Karl Schultzip kalaallit qaffasissumi atorfillit qassiiusut ataatsimeeqatigissavai, tikeraarneranullu USA-p, kunngeqarfiup nunattalu suleqatigiinnerisa pitsaanerulersinnissaa siunertaavoq.