Ane Hansen: Sinerissap qanittuani aalisartut ikiorneqartariaqarput
Taanna oqarpoq, naalakkersuisut maannakkut qanoq iliuuseqanngippata, sinerissap qanittuani aalisartut akiliisinnaajunnaarlutik aalisarnertik unitsissinnaagaat. Killiffik una tikinneqarnikuuvoq ullormiit ullormut akiliisinnaajunaarneq tikinneqarnikuulluni Ane Hansen oqarpoq. Aalisartut aningaaserivinni atorniarsinnaanerat aningaasallu atorneqarsinnasut amerlassussiat killeqartorujussuanngorsimapput. Sinerissap qanittuani aalisartut immikkut ittumik ikaarsaariarnermi ikiorsiinissamik periarfissinneqarsinnaapput aammalu inatsimmik piaartumik allannguisoqarsinnaanera Ane Hansen-ip sulissutigineqarsinnaanerarpaa. Avataasiorlutik aalisartut pinasuartumik ikiortariaqaraangata naalakkersuinikkut qanoq iliuuseqartoqartarpoq ! Ane Hansen-ilu isumaqarpoq, sinerissap qanittuani aalisartut aamma taamatut pineqartariaqartut. Sinerissap qanittuani aalisartut ikiorneqassappata immikkut ittumik aningaasaliisoqartariaqartoq Ane Hansen oqarpoq.
Sinerissap qanittuani aalisariutit teknikkikkut pisoqaassutsimikkullu ajorsiartornerat malillugu ingerlaavartumik taasersornerannut nutarternerannullu naalakkersuisut tapiissuteqarsinnaanerannik inatsit 2006-meersoq nalilersoqqinneqarnissaa kissaatigaa. Aalisarnermut Piniarnermut Nunalerinermullu Naalakkersuisoq Finn Karlsen oqasseqartinniarsimagaluarparput iluatsissinnaasimanatiguli.
