Amilaarnartumik pisoqareersoq: Ingerlaaqatigiinneq Iluliarmiunut eqqissisaataassasoq
Ilulissani innuttaasut 150-it missaanniittut ippassaq unnukkut ingerlaaqatigiipput.
Tamanna Hene Storch Geislerip ingerlaaqatigiinnermik aaqqissuussisup oqaluttuaraa.
Arfininngormat ullumilu inuup timaata ilaanik Ilulissani ikuallaavimmi nassaartoqarnera pillugu Ilulissani inuit soorunami ernumapput.
Kommunip eqqaanit arsaattarfitoqqap tungaanut ingerlaaqatigiinneq nalunaaqutaq 19.00 aallartippoq.
Ikuallaavimmi inuup timaata ilaanik nassaartoqarnera politiit sapaatiummat nalunaarutigaat. Inuup timaata ilaanik nassaartoqaqqittoq, politiit ullumi siusinnerusukkut paasissutissiissutigaat.
AAMMA ATUARUK Misissueqqissaartartut pisortaat: Timip ilai nassaarineqartut angumminngaanneerunarput
Politiit itinerusumik paasissutisseerusunngillat, politiilli misissueqqissaarnermut immikkoortortaqarfiani pisortap, Jan Lambertsenip nassaarineqartoq angutaagunartoq oqaatigaa.
Amiilaarnartumillu nassaartoqarnera pissutigalugu Ilulissani toqqissisimanngitsut amerlapput. Taamaammat iluliarmiut 150-it missaanniittut ingerlaaqatigiinnissamut peqataajartorput.
Assi: Kathrine Kruse
Avannaata Kommuniata Ilulissani Pinaveersaartitsinermut immikkoortortaqarfia ingerlaaqatigiinnissamik aaqqissuussisuuvoq.
- Palasi Ludvig Fleischer inuunermut tunngasumik oqalugiarpoq tussiummillu ataatsimik tussiaqatigiippugut aammalu naneruummik uummataasaliorluta ikitsilluta, Helene Storch Geisler oqarpoq.
- Toqqissisimanngerrappugut soorunami, innuttaasut ilaat oqarput toqqissisimanatik ilaat sininneq ajulersimasarput. Taamaammat arlaannik susoqartariaqarmat taamatut aaqqissuussivugut, oqarpoq.
Assi: Kathrine Kruse
Ilulissani ulluni tulliuttuni misissueqqissaartoqarnissaa annertusineqarpoq. Taamaammat politiit Ilulissaniittut amerlineqassasut, misissueqqissaarnermut immikkoortortaqarfiup pisortaa, Jan Lambertsen oqarpoq.
Taassuma oqarnera naapertorlugu toqutaasup kinaassusersinissaanut paasissutissarsimanngillat. Taamammat politiit innuttaasunit suli ikiorneqarusupput.
AAMMA ATUARUK Inuup timaata ilaanik Ilulissani nassaartoqaqqittoq
- Maqaasisaqartoqarneranik suli saaffigineqanngilagut. Arlaannik maqaasisaqartoqarsimassaaq, Jan Lambertsen oqarpoq.
- Taamamamat innuttaasunut kaammattuivugut: Piniariarsimasorisarsi, angalasorisarsi, aallaarsimaarsorisarsi arlaanniissorisarsiluunniit paasiarlugu attavigisiuk, misissueqqissaartut pisortaat itisiliivoq.
