Amerikamiut Issittup imartaani immamik itissusersiuiartorput
Amerikamiut umiarsuaataat, Healy, Alaskami Barrowimiit Issittup imartaanukarluni ullumi aallassaaq. Umiarsuarmut ilaapput ilisimatuut, Beaufort-ip imartaata killeqarfiata avannarpasissortaani, immap naqqa misissuivigineqanngisaannarsimasoq, itissusersiuut atorlugu pingasoqiusanngorlugu takuneqarsinnaasumik assiliisussat.
Allattoq Louise M. Kleemann
aggustip 14-at 2008 07:27
Rusland aqqartartunik siusinnerusukkut tamaannartitsisareerpoq, Qalasersuarmilu aamma erfalasuleereerluni. Rusland taamaaliormat Canada akisivoq, tamaanimi inuilaarsuarmi marlunnik sakkutooqarfiliorpoq. Amerikamiullu maannalu tassa akuliupput, imaanngilarli Sorsunnermik Nillertumik aallartitsisoqaqqinnialersoq, Danmarkimi Kalaallit Nunaannilu ujarassiuutut misissuiffimmi siunnersuisartoq, Christian Markussen, oqarpoq.
-Amerikamiut Issittup imartaani immamik itissusersiuiartuinnarput, allamik naami. Imaanngilaq tamaani oqartussaaffissarsiortut, Christian Markussen nutaarsiassaqartitsivimmut Ritzauimut oqarpoq.
