Amerikamiu politikeri nuimasoq nunatsinnukalerpoq

Amerikami politikerit nuimasoorsuit ilaat Kalaallit Nunaannut sapaatip akunnerata tulliani tikissaaq.

Senator John McCain, republikanerit sinnerlugit præsidentimut qinigassanngortingajavissoq, pingasunngorpat aggustip ulluisa 25-ianni nunatsinnut tikissaaq, silaannaap allanngoriartornera ilaatigut alapernaasissallugu. Ilulissat kangerluat eriagisaq Qeqertarsuullu Tunuani sermeq iigartartoq tikeraartit nuimasut ilaatigut ornissavaat.

Republikaneri, senator McCain, silaannaap kissatsikkiartornerata misissuivigineqarnerani suliniuteqarniarluartuuvoq.

Danmarkimi nunanut allanut ministerip, Per Stig Møllerip aamma Avatangiisinut ministerip Connie Hedegaardip Namminersornerullutik Oqartussanut ukiumoortumik tikeraarnissaannut atatillugu amerikamiut aallartitaat nunatsinniissapput.

Peqqinnissamut Avatangiisinullu naalakkersuisoq, Asii Chemnitz Narup, Danmarkimi avatangiisinut ministerip nunatsinniinnermini aamma ataatsimeeqatigissavaa. Pinngortitaleriffik takusagassaannut aamma ilaavoq. Aningaasaqarnermut nunanullu allanut tunngassuteqartunut naalakkersuisoq Josef Motzfeldt Inatsisartullu nunanut allanut sillimanissamullu ataatsimiititaliaat aamma ataatsimeeqatigineqassapput.