Allorfiup aningaaseriviit suleqatigissagai
Pinngitsuuisinnaajunnaarnermik Paasisimasaqarfiup Allorfiup nunatsinni aningaaseriviit suleqatigalugit aningaasanoorajunnermik ajornartorsiutillit aningaasaqarnerat pillugu siunnersorneqartalernissaat isumaqatigiissutigaat.
- Aningaasanoornermik ajornartorsiutillit katsorsartittut aningaasaqarnermut siunnersorteqalernissaat qulakkeeqqaarneqartalernissaat pineqarpoq, Allorfimmi pisortaq Birgit V. Niclasen oqarpoq.
Aningaasaqarneq inisseqqaarlugu Allorfimmi katsorsaaneq aallartinneqartarnissaa siunertarineqarpoq, taamaaliortoqarniarneranilu aningaaseriviit ilanngunneqarlutik.
Pisariaqartinneqarpoq
Aningaasanoorajuttummi katsorsartinnermi nalaanni aningaasaqarnertik eqqasuutigalugu tiguartinnissartik ajornakusoortittarpaat.
Taamaammat aningaasaqarnermut siunnersuisoqarnissaq pisariaqartinneqalersarpoq.
- Piffissap affaa allanik eqqarsaateqarluni pigaanni pissarsiaqarnissaq killeqartarpoq, soorlu eqqarsaatigiinnavillugu "akiligassaq, ineqarnermut akiliutit allallu". Taamaammat aningaasaqarneq inisseqqaarlugu katsorsaasalernissaq uagutsinnut iluaqutaassaaq, Birgit Nielsen oqarpoq, Allorfimmiillu ikiorneqassagaanni aningaaserivinni pineqartuni atuisuunissaq piumasaqaataannginnerarlugu.
AAMMA ATUARUK Qeqqani aningaasanoorajoqaat
Sulisut pikkorissartinneqassapput
Aningaaserivinnilu sulisut sullitaminnut aningaasanoorajunneq qanoq oqaloqatigiissutigineqarsinnaaneranik pikkorissartinneqassapput. Pasitsaassigunik saaffiginnissinnaanngorlugit.
- Saaffiginnilluni ima aperisoqarsinnaavoq: "Aningaasaateqarluartutit akissarsiagissaarlutillu takusinnaavara, taamaattorli atuinernik ataqatigiinngilaq. Aperisinnaavunga aningaasaatitit sumut atortarneritit?"
AAMMA ATUARUK Pinnguaatinik aningaasanoornermillu pinngitsuuisinnaanngitsut amerlapput
Oqaloqatigiinnerlu qanoq inerneqassanersoq sullitap akissutaanit aalajangerneqassaaq.
- Itigartitsisoqarpat allatut iliortoqarsinnaanngilaq. Akuersaartoqarpalli oqaloqatigiinneq ingerlaqqissaaq, Allorfimmi pisortaq Birgit V. Niclasen oqarpoq.
Katsorsartikkusunnerlunimi nammineq aalajangerneqartussaavoq.
Aningaasanoorajunnermik ajornartorsiuteqarluni pasitsaakkaanni Allorfimmut saaffiginnittoqarsinnaavoq.
