Qeqqani aningaasanoorajoqaat
Tamana misississuinermi " inuusuttuuneq nalorninartulimmi "atuarneqarsinnaavoq.
Atornerluinerit assiginngissutaat nunap immikkoortuini sorlerni annertunerunersut misissuinermi takuneqarsinnaavoq.
Tunumi inuusuttut 15-nit 17-nut ukioqartut 50 procentii, misissuinermi peqataasut oqarput qanigisaminni imigassamik atornerluinerit misigisarlugit.
Nunatta avannaani qeqqani kujataanilu inuusuttut 27 aamma 37 procentiisa akornanni qanigisaminni imigassamik atornerluineq misigisarlugu oqarput.
Ikiaroornartumik hash-imik atornerluinerit nunatta qeqqani annertunersaavoq.
Inuusuttut sisamaagaangaata ataatsip qanigisamini ikiaroornartumik atornerluisarneq qanimut misigisarpaat. Qanigisat pinnguaatinik atuinngitsoorsinnaannginnerat inuusuttut 23 procentiisa migisivaat.
Tunumi inuusuttut nunatta sinneranut sanilliullugit qanigisaat ikiaroornartumik hashimik pinnguaatinillu atornerluisarnerat annikinneruvoq.
Misisuinermi erseqqissaatigineqarpoq, ikiaroornartumik hash-imik atuinermut hash-ip qanoq pissarsiariuminartiginera apeqqutaasoq.
Hash nunatta qeqqani kujataanilu illoqarfinni anginerni pissarsiariuminarneruvoq.
Aningaasannarniarluni pinnguaatinik atuinngitsoorsinnaaneq soorlu bingorneq aamma maskiinanik aningasanoorutinik atuineq illoqarfinni annerusumik atorneqarput.
Ilaquttani pinnguaatinik atuinermik pinngitsuuisinnaannginneq ilaqutariinnut ajortumik sunniuteqartartoq inuusuttut pingasoraarterutaat isumaqarput. Ilaquttat qanigisallu ikiaroornartumik hash-imk atornerluisuutillugit inuusuttut 41 procentiisa toqqissisimanartinnagu oqaatigivaat.
- Atornerluineq ataatsimut isigalugu imigassamik atornerluineq annertunersaavoq, ilaqutariinni amerlasuuni assigiinngitsunik arlalillinik atornerluisoqarnera atornerluinermut tunngatillugu tamakkiisumik isiginnilluni iliuuseqarnissap pingaaruteqarneranik naqissusiisoq, nunatsinni inuusuttut pillugit misissuinermi " Inuusuttuuneq nalorninartulik" mi allassimavoq.