Aleqa: Isumaqatigiissutinik atsiortigata qimaasunik tikisitsissanngilagut
Folketingimut ilaasortaq Aleqa Hammond qimaasut pillugit oqallinnermut akulerunnermini taama oqarpoq.
Kalaallit Nunaat akulerutitsiniarnermut pilersaaruteqaleruni qimaasunik tigisisinnaanngortariaqartoq Inuit Ataqatigiinneersup Aaja Chemnitz Larsenip oqarnera, folketingimi ilaasortaaqataata Aleqa Hammondip isornartorsiorpaa.
Aamma atuaruk Aajap qimaasut pillugit akisussaaqataarusunnera ilaasa ajorigaat ilaasa nuannaraat
Aleqa Hammond naapertorlugu taamaaliornissaq allarpassuarnik pisariaqatitsivoq.
- Nunatsinninngaanniit qimaasunik tigusinissatsinnut tunngatillugu konventionit pisariaqartinneqartut angerlaassimanagillu peqataaffiginngilagut. Tigusiinnassagutta piareersimaffigisariaqarparput kikkut tigusisuussappat, allaffissornikkut allaffissoornikkut tigusisuussappat, ineqartitsisussat aammalu eqqissiviilliorneq qaangiuppat qanoq ingerlasoqaqqinnissaanut tunngasut, Aleqa Hammond oqarpoq
Taanna naapertorlugu Kalaallit Nunaata qimaasut ikittunnguit tigussagunigit, qimaasut pillugit nunat tamat akornanni isumaqatigiissutit atsioqqaartariaqarpai. Siullermilli ajornartorsiutit tamarmik maani aaqqereersimasariaqarput:
- Ilaqutariippassuit angerlarsimaffeqanngitsut, inissaqanngitsut aammalu ajorluinnartumik najugaqarfeqartut, aammalu inuppassuit suliffissaqanngitsut ikorneqarnissamik utaqqisuusut. Tamanna nalunagu isumagisassavut qarsutiinnarlugit nunani allamiunik tikisitsilluta isumaginnilernissaq, isumaqarpunga piviusumik tunngaveqanngitsumik oqalunnerusoq, Folketingimi ilaasortaq oqarpoq.
Aamma atuaruk Nunarput akisussaaqataalluni qimaasunik tigusisariaqarpoq
Aaja Chemnitz Larsenip uparuareerpaa, marloqiusamik eqqarsarnerusoq, Kalaallit Nunaata aappaani nunanut allanut tunngasut sunniuteqarfiginiutigalugit qimaasunik tiguserusunnginnami.
Kalaallit Nunaannili ikiuniarneq katersuiniartarnikkut ingerlanneqareersoq Aleqa Hammond isumaqarpoq.
- Nunatsinni katersuiniaertoqartillugu inoqqortussuseq kalaallit ataasiakkaarlutik Europamiuningaanniilluunniit ataasiakkaarlutik aningaasanik annertunerusumik tunisisarput.
